bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos invia mail stampa

26/07/2012

Su patriotu sardu a sos feudatàrios

Sos sardistas lu proponent comente innu natzionale de Sardigna

A adotare  "Su patriotu sardu a sos feudatàrios" (chi totus connoschent  mègius comente "Procurade de moderare, barones, sa tirannia") comente innu ufitziale  e istitutzionale de Sardigna. Est su chi previdet una proposta de lege  presentada dae sos cussigeris regionales de su Partidu sardu de atzione.

Custa idea l'ant bogada a pìgiu G.Sanna, capugrupu e primu firmatàriu, P.L.  Dessì, P. Manichedda e E.Planetta. In custa manera, iscrient sos rapresentantes de su  Psd'Az in sa relata de su providimentu, s'andat  a interpretare "sa sensibilidade populare  de sa Sardigna  chi giai oe si intendet rapresentada e si identìficat in su cumponimentu iscritu dae F.I.  Mannu in su 1794 in su tempus de sos motos rivolutzionàrios sardos". S'innu, narant sos cussigeris, "si podet e si devet fàghere, gasi etotu comente sa bandera e sa limba sarda, un'àteru sìmbulu  identificativu, espressivu e cunservativu de s'essèntzia ispirituale  de su Pòpulu sardu e finas una aina  pro connòschere mègius  e aprofundire s'istòria nostra, sa cultura nostra e sas raighinas nostras, indipendentemente  dae sa natzione o dae sa tzitade chi nos istràngiat, gasi comente est pro àteros pòpulos de Europa chi ant pessadu de si dare innos pròpios, comente, pro nàrrere,  "Els Segadors" adotadu dae su  Parlamentu catalanu in su '93 o "Eusko Abendaren Ereserkia" in su Paisu Bascu".

Duos sunt sos artìculos de custa proposta: su primu definit sas finalidades de sa lege e identìficat s'innu; su de duos lu cunfigurat comente sìmbulu ufitziale  de sa Regione.


#Sarvadore Serra

» in segus