bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos invia mail stampa

10/07/2012

Ufìtziu linguìsticu subracomunale nou in Meilogu


Sunt interessadas sas biddas de Boruta, Turalva, Tiesi e Giave.

dae Juvanna Tuffu retzimus e publicamus:

In su mese de làmpadas sas Comunas de Boruta, Turalva, Tiesi e Giave gràtzias a sa collaboratzione cun s'assòtziu culturale Àndalanoa, ant abertu s'ufìtziu de sa limba sarda subracomunale. Finantziadu dae sa lege istatale subra de sas minorias linguìsticas (lege 482/1999), s'Ufìtziu tenet comente obietivos printzipales cussu de promòvere e defèndere su sardu in totu sas ocasiones de bida sotziale, econòmica, amministrativa e culturale.

Cun custu progetu si cheret promòvere s'impreu orale e iscritu de sa limba sarda siat in intro de s'amministratzione siat in fora cun sos tzitadinos. Su sardu duncas in àmbitu familiare ma finas in sa bida de cada die e in sos cuntestos formales comente sos ufìtzios pùblicos.

S'incàrrigu de gestire s'ufìtziu linguìsticu subracomunale est istadu dadu a duos espertos de limba sarda: Istèvene Ruju responsàbile pro sas comunas de Tiesi e de Giave e Juvanna Tuffu responsàbile pro sas comunas de Boruta (capofila) e de Turalva.

Unu de sos còmpitos de sos espertos at a èssere cussu de fàghere a manera chi s'impreu de sa limba sarda siat “normale” in sas atividades de sas amministratziones comunales, comente sa tradutzione in sardu de sos sitos istitutzionales presentes in sa rete e de sa modulìstica, dende importàntzia particulare a sa tradutzione de s'Istatutu de s'ente, de sas iscritas de impreu pùblicu (locandinas e avisos de cale si siat casta pro su pùblicu ecc).

Ant a èssere fatos, intre santugaine e nadale de ocannu, sos cursos de formatzione de badas pro su personale de s'Ente e pro sos tzitadinos. Su cursu de formatzione tenet comente obietivu printzipale sa connoschèntzia e sas cumpetèntzias subra de s'impreu de sa limba sarda in sa redatzione de sos atos giurìdicos e amministrativos e in sas atividades de comunicatzione de sos tzitadinos.

S'ufìtziu linguìsticu in totu sas bator comunas at a èssere abertu a su pùblicu su martis e su mèrcuris.

S'Ufìtziu tenet un'indiritzu de posta eletrònica: info@ufitziumeilogu.it e at a tènnere luego unu situ internet www.ufitziumeilogu.it.


#Sarvadore Serra

» in segus