bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


17/06/2014

Sardos cun sa “sìndrome de Istocolma”, presoneris de sa linguìstica colonialista

de Diegu Corràine

Sa Limba Sarda Comuna est un'imbentu, un'esperanto, unu matzimurru, unu matzimbròddiu, un'aurtìngiu, ca: 

—est nàschida pro partzire su pòpulu Logudoresu dae su Pòpulu Campidanesu;
—l’ant imbentada pro semenare òdios;
—est fata a posta pro òchiere sos dialetos;
—est essida a campu pro iscaminare, cun règulas cumplessas, chie giai iscriet bene in duas limbas sardas;
—est sa limba de unu grupu de ditadores chi òdiant sos Campidanesos;
—est frutu de un'operatzione de "eugenètica" linguìstica nazista;
—est una trampa pro futire in manera definitiva sos Sardos;
—no la connoschet nemos;
—no la pràticat nemos;
—no la cheret nemos;
—faghet bènnere su bòmbitu a totu sos Sardos;
—punnat a aunire su chi Deus at partzidu;
—imponet una pronùntzia a totus;
—est un’arma de s’imperialismu Logudoresu;
—est sa “solutzione finale” pro sos dialetos sardos;
no est s'italianu s'inimigu linguìsticu ma sa Lcs
—minisprètziat e ochiet totu sas pàraulas chi narant in Campidanu;
—est una limba ratzista de unu grustu de pastores chi cheret cumandare a 800.000 Campidanesos;
—no est sa limba de sa Capitale;
—est una màchina pro cùrrere a pare dinare;
—est praticada dae gente chi faeddat in sardu a pagamentu;
—no at postu in mente a sos cantadores, chi sunt sos ùnicos titulados a istabilire sas normas de iscritura!
— est contra a sa Sièntzia linguìstica chi afirmat s’esistèntzia de sa Limba Logudoresa e de sa Limba Campidanesa;
—cheret giumpare una làcana istabilida dae sos “linguistas” chi nemos podet giumpare;
—est un'abbusu linguìsticu, ca no at postu in mente a sos “linguistas” chi teorizant s'incumpatibilidade genètica de Logudoresu e Campidanesu
—andat contra a sos “linguistas” chi narant chi sos Sardos, duncas, non podent tènnere una norma de iscritura ùnica;
—b’at semper una proposta e una solutzione “mègius”!
—b’at semper espertos “mègius” de sos chi ant fatu sa LSC! 
—sa LSC "bera" est un'àtera, non sa chi at deliberadu sa Giunta de sa RAS su 18.4.2006! 

Unos cantos Sardos la pessant gosi, tenent custu armamentàriu ideale! Ma, si esseret gosi a beru, si sa LSC “no esistit”, “est nudda”, “est unu bòmbitu”, pro ite si pessamentant, s’inchietant, s’arrènegant, s’assustant, s’atzicant,  contra sa LSC?

Nois, imbetzes semus pessamentados, a beru, chi esistant Sardos che a custos, chi gherrant contra a sa possibilidade de tènnere 1 limba ufitziale, chi tenent sa matessi idea de sos linguistas colonialistas, antis los adorant comente divinidades, comente sos presoneris adorant chie los at impresonados, comente acuntesset in sa “sìndrome de Istocolma”!

Ma, a dolu mannu, custa no est s'ùnica sìndrome chi ismalàidat custos Sardos. B'at finas sa "sìndrome de Oslo"! Ma nd'amus a faeddare un'àtera bia. 


#Diegu Corràine

» in segus