bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


05/05/2014

FARSÀRIOS LINGUÌSTICOS, IN CONTU DE PRONUNTZIAS e ISCRITURA de sa LSC

de Diegu Corràine

Contra a campagnas de disinformatzione pilotadas in carchi blog (pilotadas male, ca sas fàulas si bident currende), custa bia rispondo a sos amigos chi mi pedint informatziones in contu de:

PRONUNTZIAS e ISCRITURA de sa LSC
Si unu ischit a lèghere, bastat a leare su manualeddu de sa LSC publicadu in pdf in Rete dae sa RAS (iscàrriga) pro cumprèndere e ischire chi est in sa natura matessi de sa norma LSC sa possibilidade de:

1) iscrìere in una manera e pronuntziare in totu sas maneras possìbiles in sos dialetos o limbàgios locales e de...
2) passare dae totu sas pronùntzias locales a una iscritura ùnica in Lsc.

Custu si bidet craru in sa figura chi semus publichende (Limba sarda comuna, RAS, pàg. 17), in ue dae s'iscritura ogru podimus pronuntziare in cale si siat manera e a sa revessa, pronuntizende in cale si siat manera MA iscriende ogru.

Duncas, a nàrrere chi in Lsc b'at petzi una pronùntzia est una farsidade. Est totu su contràriu: sa LSC si podet lèghere in totu sos dialetos e pronùntzias locales, totus. E dae totu sos dialetos a sa LSC.
Comente in cale si siat norma iscrita de cale si siat limba.

De seguru, a fortza de repìtere custa fàula, tìpica de farsàrios linguìsticos, calicunu nche podet finas rùere in sa trampa, ma sunt semper prus pagos.

Ca, oramai, sa gente at cumpresu chi sa disinformatzione e sas fàulas sunt manovras de gente sola e disisperada, chi, non resessende a impònnere sas ideas suas, ispàrtzinat calùnnias e benenu pro nch'iscontzare s'ùnica norma chi sìamus resessidos a elaborare in 15 annos de cunfrontos e cuntierras, frutu de su traballu de duas cummissiones de espertos. 


#Diegu Corràine

» in segus