bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


07/10/2013

Sa Limba sarda comuna, una norma iscrita pro essire a campu comente natzione e comunidade territoriale sarda.

Diegu Corràine

Cando non cando, calicunu bogat a campu semper sa matessi fiolera: una norma iscrita de referèntzia pro su sardu diat sacrificare sas variedades orales, giughende·las a sa morte.


Nudda de prus farsu. Totus ischimus chi cada limba naschet comente "limba orale". Medas abbarant gasi, sena cròmpere mai a s'iscritura, e medas si nche morint, chi siant iscritas o nono. S'istòria de s'umanidade est prena de casos gosi.
Ma ischimus finas chi, si una limba si cheret ufitziale, non podet fàghere a mancu de tènnere una norma iscrita de referèntzia, chi est cumplementare a sos dialetos, ma no los escludet. In ue est su problema si oralidade e iscritura cunvivent sena s'esclùdere? Custa est sa règula de totu sas limbas ufitziales.

E totus ischimus chi, si sos dialetos de su sardu sunt in dificultade, sa neghe no est de sa norma Lsc (presentada comente unu mortore dae sos inimigos de s'ufitzialidade, chi sunt difensores acanidos de sos dialetos) ma sa onnipresèntzia iscrita e orale de s'italianu.

Custa est s'idea de sos dialetòmanes, chi tenet una variante: non tenimus bisòngiu de una norma de riferimentu pro su sardu, ca sa limba nostra tenet giai unu riferimentu istandard... s'italianu! Peus e peus.

B'at finas un'àtera idea, chi curret meda in intro de unos cantos setores polìticos chi si narant "indipendentistas" e chi de indipendentista tenent pagu, si non s'estremismu de sas paràulas. A su sòlitu si tratat de moimentos italianistas caratzados.

E custa idea est contrària, in pràtica, a s'ùnicu cumpromissu linguìsticu normativu generale chi siat istadu agatadu dae sos espertos de limba incarrigados dae su Guvernu sardu, chi at giutu a sa delìbera de su 18-4-2006: Limba Sarda Comuna. 

Sos contràrios a custa norma oponent duas ipotèticas normas istandard, fundadas in sa traditzione literària, una in su setentrione e s'àtera in su meridione de sa Sardigna. Dae custu datu istòricu importante (sa traditzione literària, in ue però cada iscritore iscriet cun particularidades suas) nde tirant s'idea chi esistint a beru duas limbas chi mutint "logudoresu" e "campidanesu", chi devent èssere adotados comente istandard ufitziale, pro rispetare sas particularidades locales e sa traditzione. In pràtica 2 limbas ufitziales! Ma si esseret gosi, chi cada regione istòrica de sa Sardigna devet tènnere  una limba iscrita diferente, tando pro èssere a beru in favore de sa gente e de su locale, pro ite devimus tènnere petzi un'istandard pro su Logudoro e una pro su Campidanu? Sa Sardigna est prus manna meda, ma meda!


Tando, pro ite no ammaniamus (sa RAS) un'istandard iscritu finas pro Anglona, Barbagia, Barigadu, Baronia, Costera, Mandrolisai, Màrghine, Marmidda, Meilogu, Monteacutu, Montiferru, Nurra, Ogiastra, Pianalza, Chirra, Romàngia, Sarcidanu, Sarrabus, Gerrei, Sulcis, Trexenta? Calicunu, però, at a nàrrere chi no esistit una "limba" de Anglona. Barbagia, Barigadu... etc. Ma si custas "no esistint" comente limba reale, prus pagu esistint su pretesu Logudoresu e Campidanesu, istandard o nono.


Su problema, est craru, est un'àteru: cherimus un'istadard pro sa natzione sarda, pro lu praticare in manera ufitziale comente comunidade territoriale SARDIGNA (autònoma, federada o indipendente). Su problema no est ite ufitzialidade devent tènnere sos dialetos locales, ma ITE LIMBA UFITZIALE DEVET TÈNNERE SA SARDIGNA.

E mancu  male la tenimus: sa Limba Sarda Comuna. 

A pustis, est lìtzitu chi, in manera personale, cada unu iscriat comente li paret, finas in su pretesu logudoresu o campidanesu literàriu, o in su limbàgiu de sa bidda sua. O chi s'imbentet finas una limba totu sua. Ma est totu un'àteru problema, diferente dae tènnere una norma ufitziale pro sos Sardos e sa Sardigna.


#Diegu Corràine

» in segus