bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


23/08/2013

Cun sa proposta de su Psdaz, s'ufitzialidade de su sardu in su tzentru de s'Agenda polìtica

de Diegu Corràine

Leghende sa proposta de modìfica de s'art. 1 de s'istatutu sardu pro su sardu ufitziale in totu, presentada dae su Psdaz su 19 de austu coladu, podimus nàrrere chi s'idea e su su testu andant bene.

Comente, però, càpitat a su sòlitu cando unu leat unu pessu e pràticat una lìnia polìtica noa, b'at chie est crìticu in totu e chie est de acordu.
Sos crìticos narant chi su Psdaz non diat èssere tituladu a fàghere sa proposta chi at fatu, ca de su sardu nde l'importat pagu; ca si diat tratare de un'essida preeletorale; ca su Psdaz etotu faeddat e faghet polìtica totu in italianu; ca diat èssere una proposta fata in soledade sena chircare s'unione cun àtere.

Forsis carchi crìtica est giusta e bera ma, pro prima cosa, devimus ammìntere chi, in contu de impreu de sa limba sarda, su Partidu sardu est in cumpanngia bona, ca su prus de sos moimentos sardos si nd'impipat de su sardu e pràticat belle semper in italianu.

Semper e cando, non tocat a mie a rispòndere a custas crìticas, ca sende chi so sardista, natzionalista sardu, non so de su Psdaz nen de perunu àteru partidu.

Duncas faeddo liberamente, narende chi so de acordu cun s'initziativa de riforma. M'interessat pagu finas sa cuntierra subra de sa modalidade solitària chi ant giutu a sa proposta.

Pro mene si tratat de un'initziativa de importu mannu, non tantu pro su testu presentadu cantu pro su fatu chi ponet cun fortza manna sa chistione de s'ufitzialidade totale de sa limba natzionale de sos Sardos in su tzentru de s'Agenda polìtica e eletorale sarda. Ma proponet cun fortza manna, comente cunseguèntzia, finas sos temas de su reconnoschimentu de sa personalidade natzionale de su pòpulu sardu, de su deretu a sa autodeterminatzione e a sa soberania.
Sa proposta l'at fata su Psdaz, tirende·si totu sas crìtica chi amus numenadu in antis. Ma l'at fata, l'at issu e no àtere!
Est craru chi su Psdaz l'at fata pessende a sas eletziones, est craru chi cheret cunditzionare sos àteros a tènnere contu de sas ideas suas.
Si su chi est faghende su Psdaz in contu de limba no andat bene, pro ite no ant fatu sa matessi cosa sos àteros moimentos e partidos?

In definitiva, no est importante chie at fatu sa proposta ma de bìdere cales sunt como sos partidos dispostos a agiuare (sena gelosias) sa proposta de su Psdaz, a manera chi siat lege in tempos curtzos!

Si sos àteros partidos ant a resessire a aunire sos votos issoro pro difèndere sos interessos natzionales sardos, faghende colare sa lege sardista, de seguru amus a èssere capatzos de bìnchere gherras finas prus mannas.


#Diegu Corràine

» in segus