bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


31/07/2013

Colonialismu e autocolonialismu in sa toponomàstica

de Diegu Corràine

Colonialismu!

Apo in pessu lèghidu chi su Ministèriu de sas Infrastruturas italianu at impostu a unas cantas Comunas sardas de nche dogare su cartellu de intrada/essida a sa bidda in sardu, diferente dae s'ufitziale, postu dae Comunas, Provìntzias o dae sa Ras. Sa prima chi los aiat postos, deghe annos a como, fiat istada sa Provìntzia de Nùgoro, in 36 Comunas (Nùgoro, Garteddi, Oroteddi, Oniai, Lòcula, Durgali, Mamujada, etc.), a initziativa de s'Ufìtziu de sa Limba Sarda de tando.

Giai un'annu a como, calicunu de s'Anas aiat proadu a pretèndere de nche catzare su cartellu "Pasada". B'aiat àpidu una protesta manna e su cartellu est abbarradu.
De seguru ant abbarrare finas sos cartellos chi, como, non cheret su Ministèriu de sas Infrastruturas italianu.
Est sa mustra chi semus capatzos de parare fronte a sos atacos chi benint "dae foras".

E s'autocolonialismu?

A dolu mannu, però, non semus capatzos de parare fronte a sos atacos chi benint "dae intro"! Comente mai, difatis, non b'at e non b'at àpidu peruna protesta cando nch'at catzadu (sas Comunas?) unos cantos cartellos pagados cun dinare pùblicu de sa Lege 26/99? Comente est capitadu in Ulìana, Oniai, Durgali, Nùgoro, etc. in ue est isparida parte manna de sos cartellos in sardu? Custa genia de atzione autocolonialista est belle peus de s'atzione colonialista de s'istadu, ca semus nois etotu chi nos nche semus "seghende" sa limba in sos topònimos, chi sunt sa mustra prus crara e nòida de s'identidade linguìstica nostra. Nde tenimus de àsiu de protestare contra a s'istadu, cando chi semus nois etotu chi semus contra a sa limba. Difatis, in custos annos, non b'at àpidu peruna protesta contra a sos poderes sardos chi nche "segant" Ulìana, Oniai, Durgali, Nùgoro, etc., sende chi prus de una bia nois (finas cun un'artìculu in sa Nuova Sardegna) amus denuntziadu custa cunduta de autocolonialismu.

Bi diat chèrrere una lege sarda chi ufitzializet petzi sos topònimos sardos chi currispondent a sa pronùntzia efetiva, ca medas de sos ufitziales non sunt in 'italianu' ma sunt petzi deformatziones de sos topònimos in sardu.


>>> in sa fotografia, una categoria noa de cartellos in sardu, sos "inesistentes": sos chi sas Comunas NON cherent pònnere, comente Tàtari, Terranoa e àteros!


#Diegu Corràine

» in segus