bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


13/04/2013

Aprovada dae sa Comuna de S'Alighera sa prima delìbera in aligheresu. E in sardu cando?

de Diegu Corràine

Su 12 de custu mese, a su chi narant sos giornales, est istada aprovada dae sa Comuna sa prima delìbera in aligheresu. Semus cuntentos mannos de custa noa chi dat presèntzia pùblica a una de sas limbas minoritàrias de Sardigna. Leghende su comunicadu chi narat chi si tratat de su "primo atto che dà inizio alla stesura delle traduzioni in catalano di Alghero delle delibere dell'esecutivo relative agli argomenti inerenti le politiche linguistiche dell' Amministrazione.",  no ischimus si si tratat de una faddina de su giornalista o de sa detzisione de sa Comuna de pònnere s'aligheresu "petzi" pro argumentos de polìtica linguìstica. Ca, si esseret gosi, diat currispòndere a unu visione culturalista de su problema de sa promotzione e tutela de sa limba: una polìtica linguìstica moderna e coerente tenet sentidu si pertocat totu sos àmbitos de sa sotziedade e de su territòriu!
Una cosa non nos agradat de sa polìtica linguìstica aligheresa: òperant comente chi S'Alighera non siat in Sardigna, comente chi s'aligheresu non siat una minoria in intro de su territòriu natzionale sardu, comente chi sos aligheresos non siant sardos chi ant imparadu su catalanu, dae sèculos! Non si tratat de una casualidade ma de unu visione ideològica chi est currende in S'Alighera oe, cumpartzida in S'Alighera e in Catalugna, chi S'Alighera siat unu tretu de Catalugna in Sardigna. Cosa chi, est craru, no est!
Si, tando, S'Alighera est Parte de Sardigna, diat dèvere bàlere una règula, basada in s'istòria e in sa lege: si sa limba de S'Alighera est s'aligheresu, in su matessi territòriu est ufitziale s'italianu ma mescamente su sardu, chi est sa limba istòrica, natzionale, de "totu" sos Sardos. Tando, pro ite non pùblicant sas delìberas e faghent polìtica linguìstica finas in sardu? Diat èssere una chistione de coerèntzia ma finas de cumbèniu, ca de seguru est dae s'italianu e non dae su sardu chi lis arribbat su perìgulu de assimilatzione linguìstica, ca est a sa comunidade sarda chi podet interessare sa sorte de s'aligheresu e no a sa comunidade italiana.

#Diegu Corràine

» in segus