bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


09/01/2013

Natzionalismu interclassista e movimentos natzionalistas de manca e de dereta

de Diegu Corràine

Su natzionalismu no est àteru si non sa dotrina (su cumplessu de ideas e teorias) chi ànimat su/sos movimentu/os de  afirmatzione de sos deretos/caràteres de una natzione determinada

Podet èssere de duas genias: 

a) natzionalismu de domìniu, cando si riferit a una natzione chi assugetat e dòminat àteras natziones, inclùdidas in intro de s'istadu chi at fraigadu (duncas, pro es., sa natzione italiana o frantzesa chi ant formadu e dòminant, cun su podere de s'Istadu, sas natziones assugetadas sarda, friulana, brètone, otzitana, etc.) o in foras,  in territòrios esternos a custu istadu "metropolitanu".  Su natzionalismu de domìniu podet  èssere praticadu dae movimentos de dereta o de manca de sa natzione dominante. Sos chi apartenent a sa natzione dominadora, chi siant de dereta o de manca e progressistas podent èssere contra a sos deretos de sas natziones dominadas, cando agiuant o teorizant s'opressione de àteras natziones! Duncas, su natzionalismu de domìniu est interclassista, ca sa defensa  de sos interessos de sa natzione dominadora podet èssere praticada dae movimentos de manca e de dereta.
Su   natzionalismu de domìniu punnat a catzigare o negare sas àteras natziones e si manifestat o s'àtuat in forma de colonialismu "internu"  (contra a sas àteras natziones in intro de sas làcanas de s'Istadu), in forma de colonialismu "esternu" (contra a pòpulos presentes in territòrios in foras de sas làcanas de s'Istadu) o de imperialismu. 

b) natzionalismu de liberatzione, cando si riferit a una natzione chi est assugetada e dominada dae un'àtera natzione, chi l'at inclùdida in intro de s'istadu chi s'at fraigadu (pro es., sas natziones  sarda, friulana, brètone, otzitana, etc. custrintas a istare in intro de s'Istadu italianu o frantzesu) o chi istat in foras,  in territòrios esternos a s'istadu "metropolitanu" colonizadore (pessamus a totu sas natziones assugetadas de su mundu, pro prima cosa a sos Tibetanos assugetados dae sa Tzina). 

Finas su natzionalismu de liberatzione est interclassista de naturale suo e podet  èssere praticadu dae movimentos de dereta o de manca de sa natzione dominada. S'elementu chi los aunit est sa liberatzione de sa natzione, su chi los diferèntziat est sa visione polìtica de s'organizatzione sotziale e econòmica pustis liberada sa natzione.
Su   natzionalismu de liberatzione punnat a si liberare dae su domìniu de àteros istados o de sa natzione dominadora in intro de s'istadu de apartenèntzia. Pro custu, pro prima cosa est rispetosu de sas àteras natziones e gherrat pro praticare su deretu de autodeterminatzione chi cunsentat de otènnere sa soberania chi si podet atuare in sa forma istitutzionale de indipendèntzia, cunfederatzione, federatzione, autonomia, integratzione. Custa ùrtima, est una possibilidade petzi teòrica, ca, in realidade diat currispòndere a negare sa natura matessi de su natzionalismu de liberatzione. Si diat tratare de una comunidade umana chi si reconnoschet e cunsìderat natzione ma non si cheret reconnota in forma de istadu a bandas, indipendente o federadu chi siat.
Tando, sa paràula natzionalismu definit su cumplessu de ideas e teorias de liberatzione de sa natzione, su motore de sa gherra pro sa soberania, chi si podet trasformare in sa pràtica (cunforma a sa voluntade espressada dae sa colletividade natzionale) in indipendèntzia, cunfederatzione, federatzione o autonomia, sa prima cun pòderes màssimos, s'ùrtima cun poderes mìnimos. Est craru finas chi podimus èssere natzionalistas e in favore de sa indipendèntzia, cunfederatzione, federatzione, autonomia (cunforma a su chi nos agradat de prus), ma non podimus èssere in favore de sa indipendèntzia, cunfederatzione, federatzione, autonomia, sena èssere natziolastas. A si definire indipendentistas sena èssere natzionalista est petzi unu giogu de paràulas sena sentidu, chi servit a negare su "motore" de sa gherra pro sa indipendèntzia, cunfederatzione, federatzione, autonomia!

Duncas, si est beru chi su natzionalismu (sena distintzione, chi siat de domìniu o de liberatazione) est interclassista, ca si format pro afirmare sos deretos de "totu" sa natzione (cun totu sas classes), est finas beru chi sos movimentos cuncretos, reales, podent èssere natzionalistas de dereta o natzionalistas de manca, o finas natzionalistas interclassistas (eventu prus raru).

Ca, duncas, b'at duas castas de cuntrastu e contrapositzione: sa prima pro sos deretos natzionales, sa segunda pro sos deretos sotziales de classe o categoria.

Sa prima si còllocat a unu livellu prus bassu e podet aunire, est craru, una cantidade de pessones prus manna.

Est finas possìbile (ma raru) chi unu movimentu natzionalista de liberatzione potzat cumbìnchere (reclamende sos deretos colletivos e democràticos decrarados in sos Documentos internatzionales) una parte de sa natzione dominante a l'agiuare in sa gherra de liberatzione. Pro custu, sos movimentos de sas natziones dominadas non si devent mai cungiare sa ghenna a alliàntzias tàticas cun chie si siat chi si neghet a èssere imperialista o colonialista in intro de sa natzione dominadora. Totus si proclamant, a dereta e a manca, in favore de s'autodeterminatzione de sos pòpulos, ma sa pràtica est diferente. A dolu mannu nostru, però, in intro de sas sos istados in ue b'at una natzione dominadora (s'italiana, sa frantzesa, etc.) finas sos chi si definint liberales, democràticos, progressistas (chi a paràulas sunt pro sos deretos de sos pòpulos) faghent a "imperialistas" o a "colonialistas", ca sunt dispostos a agiuare de prus sas natziones e pòpulos esternos a s'istadu de apartenèntzia issoro chi non sas natziones internas de s'istadu. Semus faeddende de chie est in favore de Palestinesos, Curdos, Bèrberos ma est contràriu a s'autodeterminatzione de sos Sardos, de sos Friulanos, etc.!

Duncas, pro torrare a chistiones nostras, non nos ispantat (antis nos paret normale) chi finas in Sardigna b'apat movimentos natzionalistas de dereta e movimentos natzionalistas de manca, comente in cale si siat àteru logu. S'importante est a lu nàrrere in manera crara e a lu praticare in manera coerente.


#Diegu Corràine

» in segus