bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


Progres, movimentu italianista e antinatzionale?

de Diegu Corràine

Progres at fatu su segundu “cungressu” suo in Casteddu, su 29 coladu. In su limbàgiu issoro, sa riunione cungressuale si narat SUMMIT (no una faddina ma una cunfirma de s’anglomania de su cungressu coladu de Arbatassa)! Ridìculos, provintziales, presumidos, cun custu impreu de s’inglesu in ue nos dìamus isetare su sardu! Si abbaidamus sa fotografia de su palcu, paret una riunione de promotzione de unu produtu cumertziale americanu. Ma giogant a èssere unu movimentu polìticu sardu. In realidade sunt unu movimenteddu italianu chi bèntulat sa paràula “indipendèntzia” pro fàghere caminu in Sardigna, comente chi si tratet de unu “giogu de ruolu”. Sas cosas de importu, sos discursos, los faghent totu in italianu (in cumpangia bona cun sos àteros movimentos sardos), sende chi parent in favore a su sardu.

S’idea chi Progres tenet de sa limba sarda, in prus, est curiosa, si non perigulosa e, in definitiva, antisarda: Riconosciamo il diritto individuale di ogni cittadino sardo di utilizzare tutte le lingue nazionali con pari dignità, in un contesto di pieno e effettivo multilinguismo. Affermiamo il diritto collettivo del popolo sardo all’utilizzo di tutte le lingue nazionali in tutti gli ambiti”. E de polìtica linguìstica non faeddant? De presèntzia normale de su sardu in su territòriu e in sa sotziedade? E cales sunt sas limbas natzionales? E pro ite totus diant dèvere èssere natzionales? Finas s’italianu?

A dolu mannu, tenent sas matessi ideas de sa destra/sinistra istatalista italiana in contu de limba sarda: faeddant de deretu individuale a su sardu non de deretu colletivu de sos Sardos a sa limba issoro; nde faghent una chistione de deretu passivu a s’impreu personale e non colletivu de sa limba sarda; non distinghent su sardu (sa limba natzionale sarda) dae sas limbas minoritàrias in Sardigna (tataresu, aligheresu, gadduresu, tabarchinu).

Ma in sa conca issoro, ite est “indipendèntzia” si tenent bisòngiu de sa limba italiana pro sa comunicatzione interna e esterna? 

Progres, in contu de limba sarda, tenet sas matessi positzione chi sa destra ispagnola de su Partido Popular tenet contra a su galitzianu, bascu, catalanu. E si definint “indipendentistas”! Unu frastimu!

In prus, cun s’idea curiosa de “multilinguismo” cherent catzare a su sardu sos deretos de limba natzionale e ufitziale. Peus de sos colonialistas italianos! Ma Progres patit sa maladia de su “autocolonialismu”. Finas sa Lege istatale n. 482/99 est prus coerente e in favore nostru, in contu de limba, de sas positziones de Progres!

Si non connoschera calicunu de sos membros suos, chi mi paret sìncheru, dia pessare chi si tratet de unu grupu de piliseris presumidos, postos pro nche catzare fortza a su movimentu natzionale e linguìsticu sardu.  


#Diegu Corràine

» in segus