bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


18/12/2012

Sos natzionalistas catalanos de CiU (dereta) e de ERC (manca) aunidos pro cunvocare su referendum de autodeterminatzione pro su 2014

de Diegu Corràine

Sos natzionalistas catalanos de CiU e de ERC ant a cunvocare su referendum de autodeterminatzione pro su 2014

Su presidente de Catalugna, Artur Mas, de CiU (dereta) oe s'est postu de acordu cun s'opositzione indipendentista de ERC (manca) pro cunvocare unu referendum de autodeterminatzione in su 2014.

Su presidente de ERC Oriol Junqueras at decraradu chi s'acordu cuntemplat finas de aprovare una lege catalana de consultas referendàrias, in antis de cunvocare su referendum de autodeterminatzione, chi diat dèvere èssere atuadu in s'atòngiu de su 2014, in sa matessi època de su referendum iscotzesu!

Sos duos partidos fiant negotziende una lìnia comuna a pustis de sas eletziones de su 25 santandria chi no ant dadu sa majoria a CiU ma ant afortidu ERC. Difatis, Convergencia i Uniò est colada dae 62 a 50 deputados in su parlamentu catalanu fatu de 135 deputados, cando chi ERC est coladu dae 10 a 21 deputados. De seguru, a pàrrere de unos cantos analistas polìticos, su fatu chi Mas, durante sa campagna eletorale, no apat mai faeddadu de "indipendèntzia" at cumbintu unos cantos eletores moderados ma indipendentistas a votare ERC.

Cun 71 deputados, sós duos partidos sunt seguros de fàghere colare totu sos càmbios de lege chi potzant cunsentire su referendum.

Sende gasi, ERC non cheret intrare in unu guvernu de coalitzione ma at impromìntidu de apojare a CiU.

Custa manera de operare de CiU e ERC nos mustrat comente partidos cun issèbereos ideològicos diferentes —si non contràrios— siant capatzos de s'aunire pro praticare a beru s'idea natzionalista pro una Catalugna indipendente. Una letzione chi dìamus dèvere imparare finas in Sardigna: su natzionalismu no est de manca nen de dereta, ma sos movimentos natzionalistas si podent collocare a manca o a dereta, aunidos cando tenent finalidades "natzionales".


#Diegu Corràine

» in segus