bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


17/08/2012

GOOGLE EST GIAI FAEDDENDE IN CATALANU, BASCU, GALITZIANU. E IN SARDU?

de Diegu Corràine

Su servidore Google est giai faeddende in catalanu, bascu, galitzianu. "Faeddende" a beru, ca s'impresa americana at inclùdidu custas tres limbas in su servìtziu suo de "chirca cun boghae", Voice Search.

Google at informadu in su blog ufitziale suo chi finas bùlgaru, portughesu, fìnnicu, islandesu, islovacu e isvedesu, norvegesu, romenu, serbu, ungheresu si sunt agiuntos a su servìtziu VS, chi funtzionat in sos telèfonos mòbiles cun sistema operativu Android (v. 2.2). Cun custas àteras limbas, su servìtziu balet pro 42 limbas!

E in sardu? Ite faghimus? Si sos moimentos polìticos finas "indipendentistas" preferint s'italianu in sa propaganda issoro, si sos intelletuales faghent su matessi, e gasi sos professores de universidade; si b'at galu calicunu chi est gherrende (a sa sola o in cumpangia) contra a s'ùnicu sistema operativu linguìsticu coerente e pràticu chi tenimus: sa Lsc, chi est s'ùnicu a tretu de pòdere gestire  s'ufitzialidade de su sardu, a chie tocat a operare? Forsis at a tocare a chie no est militante polìticu, intelletuale, universitàriu, a operare pro s'ufitzialidade de su sardu, pro fàghere a manera chi sa limba nostra natzionale siat "normale" in sa sotziedade. Duncas at a tocare a sas pessones chi istimant su sardu: maistros, professores, istudentes, tècnicos, traballadores, etc. apassionados de limba e de informàtica.

In aterue ant formadu a posta grupos de tradutores voluntàrios pro sa localizatziones de programas, sistemas operativos, navigadores, aplicatziones pro sas retes sotziales. Unu de sos prus connotos e operativos est SoftCatalà, in ue su nùmene est giai unu "programa" operativu.

At a tocare a fàghere su matessi in Sardigna, ca tentativos nd'ant fatu medas, ma asu chi isco sena resurtados de gabbale: unu grupu de voluntàrios in rete pro sardizare custos aplicativos informàticos, cun s'impinnu —pro prima cosa— de localizare pròpiu Google. Ma pro otènnere resurtados e reconnoschimentu, bi cheret coerèntzia, disciplina e costàntzia linguìstica. A la tenimus custa voluntade e custas caraterìsticas? Si ei, tocat a cumintzare.

#Diegu Corràine

» in segus