bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


07/08/2012

S'Alighera (L'Alguer) in Sardigna est o nono?

de Diegu Corràine

Amus semper ischidu chi, cunforma a sa lege 26 de su 1997, in Sardigna sa limba de s'isula est su sardu e chi, in sos territòrios issoro, tenet su matessi tratamentu de lege finas su gadduresu, su tataresu, s'aligheresu e su tabarchinu. Duncas, su sardu est sa limba generale, sas àteras sunt minorias linguìsticas de sa Sardigna.

Diat pàrrere totu craru, giuridicamente e linguisticamente. Ma in sa realidade diat pàrere chi nono. Urtimamente in S'Alighera ant propostu chi sos avisos in s'aeroportu siant finas in catalanu. Semus cuntentos mannos si in S'Alighera ant a resessire a otènnere custa possibilidade. Ma comente est chi no ant pedidu chi sos avisos siant finas in sardu, sende chi custa est sa limba de totu su territòriu de sa Sardigna e chi a s'aeroportu de S'Alighera andant Sardos dae totu s'ìsula? Est un'aeroportu de sa Sardigna o de S'Alighera ebbia? S'Alighera in Sardigna est o in ue?

Mi timo chi unos cantos aligheresos, dae cando ant imparadu chi s'aligheresu est catalanu, si creent catalanos, sena pessare chi sunt Sardos chi ant imparadu su catalanu! E custu lis càmbiat sa mirada. 

Deo non creo chi s'aligheresu s'at a sarvare a sa sola si non si sarvat su sardu. Su cuncurrente linguìsticu de ambos est s'italianu e sardu e catalanu tenent totu s'interessu de s'aunire pro s'afortire ambos. Pro custu pessamus chi in S'Alighera devant tènnere s'interessu primu de praticare s'ufitzialidade in aligheresu, sardu e finas italianu. Finas in sa toponomàstica, in totu s territòriu, in sa bidda e in s'aeroportu, cun cartellos comente sos de sa figura: L'Alguer / S'Alighera o Aeroport de L'Alguer / Aeroportu de S'ALighera.


#Diegu Corràine

» in segus