bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


01/08/2012

SA LEGA NORD PRO SA LIMBA SARDA! A BERU?

de Diegu Corràine

Sa lista de sos "amigos" de sa limba sarda est in crèschida: eris sas agentzias nos ant contadu chi su parlamentare europeu de sa Lega Nord Borghezio difendet sa limba sarda e crìticat sos polìticos locales. Borghezio, in un'interrogatzione a sa Cumissione europea at naradu: ''Il 10 luglio scorso, gli stessi parlamentari sardi non hanno presentato alcun emendamento in favore del sardo, accettando di fatto un testo di ratifica della Carta europea delle lingue regionali e minoritarie che finisce con il delegittimare l'insegnamento a scuola e la circolazione sociale dell'antica lingua isolana''. In prus at naradu chi s'Unione europea aiat dispostu 128 milliones de èuros pro finantziare initziativas in profetu de sa limba sarda.
Ma dae ue l'at bogada custa fantasia de sos 128 milliones de èuros? Dae s'artìculu de F. Brevini in su Corsera, de seguru! Bidende seis comente funtzionat sa disinformatzione? Si la colant dae s'unu a s'àteru!

Paret chi Borghezio nos siat benende in agiudu! E imbetzes nono. Servit petzi a misturare dialetos italianos e limbas natzionales che a su sardu in unu matzimurru mannu, pro destabilizare sa 482/99, aberende custa lege a totus, comente cheret finas sa UniSS, s'Universidade de Tàtari, in s'ùrtimu comunicadu chi at bogadu a campu.

Su tentativu est de isnaturare sa 482, in ue sunt tuteladas "ìsulas" linguìsticas che a su sardu e "penìsulas" (duncas limbas che sas àteras chi tenent sa parte "continentale" in foras de s'istadu italianu) linguìsticas (albanesu, croatu, etc.), pro nche cravare totu sos dialetos italianos.
A dolu mannu Brevini e Tanda, chi parent interessados a misturare,politicamente, dialetos e limbas, paris cun UniSS, sunt sighende custu caminu. Si totus in s'istadu italianu diant èssere tutelados dae sa 482, totus ant a èssere minorias! E sa majoria cale diat èssere?

Sa cosa curiosa est chi tenimus unu parlamentare sardu (ma chi non rapresentat sa Sardigna) in su Parlamentu Europeu: Giommaria Uggias! Però est Borghezio chi s'interessat de sardu! 

Est craru chi Borghezio s'ispàssiat mustrende chi sos deputados sardos non balent mancu a si difèndere su chi diat dèvere èssere issoro, sa limba.

Ma forsis b'at finas s'intentu de giogare sa carta polìtica de su "do ut des", mustrende·si amigu de sos Sardos in contu de limba, pro èssere agiuadu, unu cras, forsis, dae sos Sardos a nche cravare sas "limbas" padanas in sa 482.

Màriu Carboni, de su Comitadu pro sa limba sarda, nos at ammentadu chi su presidente de sa cumissione Esteri de sa Càmera chi at aprovadu sa lege de ratìfica de sa Carta de sas limbas chi escludet sa limba sarda, est leghista!

Est craru chi sa Lega e Borghezio sunt faghende duas partes in cumèdia e chi de su sardu no nde lis importat nudda! Duncas non nos agradat meda chi Borghezio siat in sa lista de sos amigos de su sardu. De amigos gosi nde faghimus a mancu.


#Diegu Corràine

» in segus