bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


07/07/2012

Si b'at de imparare, imparemus finas dae sos Catalanos in chistiones de polìtica linguìstica

de Diegu Corràine

Cando faeddamus de mèdios e ideas pro parare fronte a su disacatu de sa morte de sas limbas, de sa limba sarda in particulare, pessamus semper chi siat cumbeniosu a bìdere ite ant fatu sas àteras limbas chi sunt resessidas o sunt resessende a minimare su dannu de sa morte de sa limba natzionale, de sa limba pròpia. Su modellu prus a probe chi tenimus est su de su Catalanu. Ma s'acusa chi bogant a campu sos inimigos de su sardu est chi sas duas limbas e sas duas istòrias linguìsticas non si podent paragonare. E agiunghent chi su catalanu s'est sarvende ca sos Catalanos sunt ricos!. At a èssere, ma non bi creo chi siat custa sa resone, a su nessi no est sa prima resone.

Pro mene, imbetzes, no est petzi chistione de dinare, ma est chistione de tènnere IDEA, s'idea. S'idea de èssere natzione e chi sa limba nd'est su motore o s'alimentu. Est beru chi est gosi, comente mustrant sos Catalanos, lu repito, sena tìmere de èssere atacadu comente estremista e esteròfilu. 

In custa gherra contra a s'assimilatzione linguìstica e, in definitiva, natzionale de sa Sardigna, bi cheret coerèntzia, costàntzia, perseveràntzia, ispìridu de unidade, disciplina, umilidade, voluntariadu, belle semper sena paga! Giai est nudda! 
Sos Catalanos mustrant de tènnere custas calidades. A nois Sardos nde diat bastare a su nessi una, ma non resesso galu a l'agatare.

Giugu Ledda, unu dotore sardu apassionadu e tradutore de limba sarda chi istat in Bartzellona e connoschet bene ambas sotziedades, sa sarda e sa catalana, at iscritu de reghente, in risposta a chie naraiat chi sos Catalanos sunt istados sarvados dae su "dinare" chi tenent: «sos catalanos non sunt istados sarbados, no ant isetadu nen meràculos e nen sarbadores; si sunt sarbados a sa sola, traballende e creende a su faghiant.»

In prus, no est mancu totu chistione de dinare, ca sos Catalanos ricos, pròpiu ca sunt ricos, si diant pòdere isperdissiare su dinare (e bi nd'at de seguru chi lu faghent) in àteru e no in limba, ca sos ricos non tenent perunu òbrigu de gastare su dinare issoro in "limba"! Si lu faghent est ca tenent IDEA. E tenent un'idea gasi crara de su funtzione tzentrale e indispensàbile de sa limba in su fràigu de sa natzione e libertade issoro, chi si ponent su problema de cunsentire e afortire s'imparòngiu de sa limba catalana a totu sos immigrados istràngios chi suprint a Catalugna.

E in Sardigna pro ite custa idea est dèbile? Ite nde narant sos letores?


#Diegu Corràine

» in segus