bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


26/06/2012

Indipendèntzia o tzessione de soverania?

de Sarvadore Serra

A bias càpitat chi, pro difèndere una tesi, si dant argumentos a sa tesi contrària. Custu est  capitadu, a pàrrere nostru, a su professor F. Pigliaru, in un’artìculu, publicadu de reghente in sa “Nuova Sardegna”, in ue afrontat sa chistione de s’indipendentismu. In custu interventu isse narat (giustamente, nos paret) chi, in s’Unione Europea, sos problemas sunt nàschidos dae su fatu chi sa renùntzia a sas monedas istatales  no est istada acumpangiada dae una pèrdida parallela de soverania in àteros campos, che a su de sa polìtica fiscale o su de su controllu de su sistema de su crèditu; agiunghet chi custa paga tzessione de soverania impedit oe a s’Europa de parare fronte e agatare unu remèdiu a dificultades, a bi pessare bene, limitadas, che a sa de sa Grètzia e sa de sos dèpidos acumulados dae sos Istados membros sìngulos; mentovat a Paul Krugman chi, in su New York Tines, narat chi s’àrea de su dòllaru funtzionat sena crisis istatales graves che a sas europeas ca in sos Istados Unidos b’at unu guvernu tzentrale forte, chi sas atividades suas dant pranos automàticos de sarvamentu   a sos Istados sìngulos interessados dae crisis econòmicas. E finas a como non b’at nudda de èssere contràrios:  comente si faghet a obietare a arresonamentos gasi lògicos?  Su chi non nos cumbinchet, però,  sunt sas conclusiones. Professor Pigliaru, difatis, notat chi nen sa Califòrnia, nen sas Florida, nen sos àteros Istados americanos  bisant de si fàghere indipendentes e, duncas, de nche pèrdere su profetu de custu guvernu multilivellu. Tando, si pregontat: si sa Califòrnia non cheret s’indipendèntzia, pro ite la diant dèvere chèrrere s’Iscòtzia o sa Sardigna? E inoghe b’at a beru unu brincu lògicu. S’Iscòtzia non cheret abbandonare s’Europa: antis, sa ghia indipendentista Alex Salmond at naradu chi diat chèrrere chi s’Iscòtzia intret in s’èuro.  In Sardigna, de su 40 pro chentu de pessones chi , cunforma a un’incherta demoscòpica, cherent s’indipendèntzia, petzi su 10 cherent a nch’essire dae s’Unione; s’àteru trinta cheret a abbarrare. Diat pàrrere, duncas, chi s’Iscòtzia e sa Sardigna cherent a “tzèdere soverania” a sa UE. Comente sa Califòrnia cun sos Istados Unidos. Si in casu, su prus de sos iscotzesos e de sos sardos indipendentistas, mancari abbarrende europeos, si cherent distacare, rispetivamente, dae su Rennu Unidu e dae s’Itàlia. Ma custu est un’àteru contu.


#Sarvadore Serra

» in segus