bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


30/04/2012

IDENTIDADE SENA LIMBA: sa fiolera sòlita de unos cantos intelletuales sardos

de Diegu Corràine

Nos dispraghet chi su 28 de abrile, Die de sa Sardigna, siat istada s'ocasione pro santificare s'idea chi s'identidade culturale e natzionale sarda siat una gàbbia dae ue tocat a fuire in corrias de fogu o chi s'identidade sarda podet fàghere a mancu de sa limba sarda. Ideas non noas, chi una parte manna de sos intelletuales de Sardigna (mescamente de sa manca italianista e cosmopolitista), bogat a campu semper, contra a chie gherrat pro s'ufitzialidade de su sardu. 

Non nos ispantat chi totu custu armamentàriu ideològicu siat propostu in ocasione de sa Die de su 28 de abrile. De seguru est una proa, dae sas àrtarias de s'Academia, pro nche catzare autoridade e fortza a su sentimentu natzionale sardu chi est intrende semper de prus in sa gioventude sarda, mescamente sa prus ispabilla e istudiada, acostumada a connòschere limbas, a girare su mundu, ma finas a torrare a s'identidade "natzionale sarda" e a sa limba, comente est capitendea sos istudentes sardos in sas iscolas e in sas universidaes nostras e istràngias.

Pro bogare a campu custas ideas, sa Ras a pagadu unu seminàriu de duas dies in s'Isre de Nùgoro, currende a pare una trintina de espertos de universidade e nono.
Cunforma a su chi at contadu sa Nuova Sardegna de su 30 de abrile, est mescamente su prof. Pietro Clemente (ordinàriu de antropologia in Firenze) chi s'at leadu s'incàrrigu de manifestare custas ideas, cando at naradu riferende·si a sos iscritores sardos in italianu (si est giustu su chi riferit su giornalista F. Pirisi): "Opere scritte in italiano, ma che vengono lette come una letteratura nazionale" [...] "E questo significa che il fatto della lingua non è determinante per vivere la propria identità".

Est semper sa matessi fiolera, sa pretesa chi s'identidade sarda potzat èssere sena limba e chi sa literadura iscrita in italianu devat èssere cunsiderada "sarda".
No essende pòdidos andare a custas duas dies de cunfrontu, no ischimus si su tìtulu de s'art. "La cultura sarda oltre la gabbia dell'identità" est sa sìntesi giusta de su seminàriu de s'Isre. Si esseret giusta, però, diat èssere coerente cun s'idea e cun sa pràtica de afortire sos protzessos de autocolonizatzione, de autoòdiu, de alienatzione natzionale, linguìstica e culturale in favore de s'italianu propostos dae unos cantos intelletuales sardos.

#Diegu Corràine

» in segus