Pàrreres

A fortza de puntorgiare, carchi cosa s'est moende in intro de s'iscola. Pustis de medas interventos in intro de s'Osservatòriu ma mescamente pustis chi su Comitadu pro sa limba sarda, in unu comunicadu reghente, at pedidu de aplicare sa Lege 482 chi cunsentit a sas famìlias de isseberare su sardu in s'iscola pro sos fìgios issoro, sa Diretzione iscolàstica regionale s'est mòida e su 6.2.2012 at pedidu a totu sas iscolas de fàghere sa rilevatzione de sos orientamentos de sas famìlias in contu de insinanmentu de su sardu. Totu est a cumintzare. Bene meda! Làstima però chi l'apant fatu 14 dies in antis de s'iscadèntzia de presentatzione de sa dimanda de iscritzione! Belle peruna iscola at acudidu a pònnere custa novidade in su modellu de dimanda. E làstima chi sa Diretzione iscolastica regionale no apat cussigiadu de pònnere su sardu in sa dimanda paris cun sas àteras limbas, sena peruna fòrmula limitante o vinculante. Pro annoas devimus fàghere a manera chi custa tzirculare siat imbiada a sas iscola a su nessi duos meses in antis e chi s'issèbereu de su sardu siat su primu ma paritàriu cun sas àteras limbas, non postu a bandas e discriminadu. Su sardu cheret imparadu cun sa crae giusta e in manera moderna