bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


12/10/2011

Su sardu, limba natzionale, e sas minorias linguìsticas de Sardigna. Sos ùrtimos giogos de sos "progresistas"

de Diegu Corràine

Movimentos comente ProgReS non tenent galu crara sa relatzione de su sardu cun sas àteras limbas faeddadas in su "territòriu" de Sardigna: aligheresu, gadduresu, tataresu, tabarchinu. E duncas narant chi sunt, totus, limbas "natzionales" sardas o LSM (Limbas Sardas Minorizadas), totus in su matessi livellu, sena contare su ruolu istòricu, culturale, identitàriu de cadauna, de su sardu comente limba natzionale pro prima cosa. Unu matzimurru sena contu nen cabu, in ue su sardu no est prus sa limba natzionale nostra ma un'elementu cale si siat de unu "plurilinguismu" genèricu.

Diat bastare sa Lege 26 de su 97 pro tènnere ideas prus craras. Difatis custa Lege de "promotzione e valorizatzione" de sa "limba de Sardigna" reconnoschet chi su sardu est sa limba natzionale nostra, ma in su matessi tempus chi (art. 2, c. 4) narat chi: «Sa matessi valèntzia atribuida a sa cultura e a sa limba sarda est reconnota cun riferimentu a su territòriu interessadu, a sa cultura e a sa limba catalana de S'Alighera, a su tabarchinu de sas ìsulas de su Sulcis, a su dialetu tataresu e a su gadduresu», cunsiderende·las comente minorias linguìsticas de Sardigna. Su sardu est sa limba natzionale dae 1000 annos, sas àteras sunt, in càmbiu, su resurtadu de eventos istòricos particulares. Chi non podent tocare ne minimare sa primatzia de sa limba sarda.

Ma a chie torrant a contu custos giogos de paràulas de sos "progresistas"? A sa limba sarda de seguru nono, ma mancu a sas àteras, ca si non si sarvat su sardu comente limba natzionale sarda, pro sas àteras at a èssere finas peus. 

Custa est petzi una manera noa de nos chèrrere male! Pro chie est macu e lis ponet in mente. Ma non pro nois.

#Diegu Corràine

» in segus