bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


21/11/2010

Variedades linguìsticas italianas e lege 482. Totu minorias? E sa majoria?

de Diegu Corràine

Su documentu depositadu  su 17.11.2010 in su Cussìgiu regionale de Piemonte pro su reconnoschimentu de su piemontesu comente limba est essidu a  campu a pustis de ses meses dae sa botzadura de sa Corte Costitutzionale a sa lege regionale chi cheriat tutelare su piemontesu, lege decrarada incostitutzionale.

Sa lege fiat istada aprovada a s’unanimidade in sa legisladura colada de tzentrusinistra. Ma sa botzadura fiat arribbada in su mese de maju coladu, pustis de s’eletzione de su leghista Roberto Cota, chi aiat impromìntidu de la torrare a presentare. Cosa chi est capitada.

Su problema est chi sos Piemontesos non cherent una tutela cale si siat ma cherent su reconnoschimentu comente minoria in intro de sa Lege 482/99, sa matessi chi reconnoschet 12 minorias istòricas, pro prima cosa su sardu.

No isco comente at a andare a finire, ma si intrat in sa 482 su piemontesu, pro ite nono a su lombardu, a su venetu, a s'emilianu, a su romagnolu, a su calabresu, sitzilianu, lucanu, pugliesu, abrutzesu... a su toscanu? Ma tando, si ant a èssere totu minorias cale at a èssere sa majoria? 

Deo non so contràriu a sa tutela de limbas, limbàgios o variedades linguìsticas. Ma in custu casu e in sos àteros, pro ite non proponent a s’istadu una lege apòsita pro sas variedades regionales italianas? 

Mi timo, però, chi su de bòlere intrare in sa 482 pro su piemontesu e sos àteros limbàgios regionales italianos diat èssere una manera pro isboidare sa lege, pro la "diluire", pro nche catzare podere a sas minorias giai reconnotas, prus de su chi nch'ant giai catzadu! Bastet de pessare chi sa 482 in su 1999 teniat 9,5 milliones de èuros pro totu s'istadu e como, a deghe annos dae tando, su dinare in totale est torradu a 1,5 milliones de èuros: pagos soddos! Si custos soddos los devimus partzire non prus in 12 ma in 30, ite b'at  a abbarrare?


#Diegu Corràine

» in segus