bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


18/08/2011

In bascu s'esàmene teòricu de sa patente. A proamus finas in Sardigna?

de Diegu Corràine

Dae unas canta chidas, in Euskadi, in Paisu Bascu duncas, ant presentadu su progetu pro cunsentire de fàghere s'esàmene teòricu  de sa patente in bascu in 52 autoiscolas de sa Comunidad Autónoma Vasca. E totu custu gràtzias a materiale multimediale elaboradu in limba basca e a su traballu de istrutores euskaldunos (de limba basca) cualificados.

 

Sa campagna En euskera tiene su punto-Euskaraz badu halako puntu bat, pro ispainare sa possibilidade de usu de sa limba basca in s'imparòngiu de sa teoria pro devènnere autistas patentados, l'ant presentada sa vitzecussigera de Polìtica Linguìstica de su Guvernu bascu, Lurdes Auzmendi, e sa Diretora de Tràficu de sa CAV, Amparo López. 

 

Unu cras, s'àtera posta chi devent bìnchere in Paisu Bascu est sa possibilidade de fàghere finas s'esàmene pràticu in bascu. Ma finas de crèschere sa cantidade de iscolas chi proponent custu esàmene, in ue sos candidados imparant a connòschere finas sa normativa de tràficu in bascu.

 

Si pessamus chi su bascu est una limba preindoeuropea e chi est faeddada petzi dae sa tertza parte de sa populatzione, nos abbigiamus de cantu isfortzu sunt faghende sos Bascos e cantu custas atziones sunt istratègicas, ca currispondent a s'idea de polìtica linguìstica de afortire sa "normalidade" de sa limba. Duncas, fàghere a manera chi su euskera siat presente in cada campu e impreu.

 

E si in Sardigna cumintzamus dae custu àmbitu de imparu chi "semper iscola est"? E chi dat sa possibilidade de isperimentare in sardu finas una terminologia apòsita, moderna e ispetzialìstica. E finas sa possibilidade de propònnere su sardu a pessones noas, chi si tratet de professores o de alunnos.

 

Baddu si un'esperèntzia de sardu in sas autoiscolas non potzat animare finas àteras genias de iscola a impreare su sardu, finas… s'Universidade!

 

[In sa fotografia, Lurdes Auzmendi e Amparo López]


#Diegu Corràine

» in segus