bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


11/08/2011

Informatzione (mancada) in sardu e assòtzios culturales, fortzas natzionalistas, indipendentistas.

de Diegu Corràine

Est giai capitadu prus de una bia chi rapresentantes de assòtzios culturales "identitàrios" sardos, de sas fortzas natzionalistas, indipendentistas, si siant chessados cun nois ca non publicamus bastante noas chi s'interessent de sas ideas e atividades issoro. Amus semper rispostu chi tenimus ite fàghere meda cun materiales informativos chi nos arribbant in inglesu, frantzesu, ispagnolu, catalanu e àteras limbas minoritàrias (sas chi cumprendimus!). Ca sa finalidade prima de custu situ est s'informatzione a propòsitu de sas limbas e sas natziones.

 

Ma nos tocat finas de impreare materiales informativos (avisos, comunicados…) chi nos arribbant in italianu e faghimus cantu podimus pro los propònnere in sardu in sa s noas nostras. Ma cando custos materiales o comunicados in italianu nos arribbant dae assòtzios culturales, fortzas natzionalistas, indipendentistas, chi diant dèvere tènnere su sardu comente elementu tzentrale de s'atzione e de s'ideale issoro, nos benit unu pagu de benenu! E tando, no est semper chi los leamus in su cunsideru chi si diant meritare (si no est chi carchi amigu issoro nos los bortata in sardu!). Non nos agradat meda a traballare in parte de sos àteros, si mancu isssos mustrant de nde tènnere s'interessu.

 

B'at petzi carchi ufìtziu de sa limba sarda, comente su de sa provìntzia Terranoa-Tèmpiu, chi faghet semper sos comunicados in sardu e in italianu. E, sigomente sunt materiales informativos iscritos in sardu Lsc (chi est sa norma sighida dae L&N), una parte mannu de custos testos podet intrare in sa noa nostra. Naramus chi totu custu nos agiuat in su traballu.

 

At a essere pagu, ma finas L&N podet èssere un'ocasione in prus pro propagandare s'informatzione identitària. A su nessi ca semus in pagos, a dolu mannu, a propònnere, semper, informatzione in sardu.

 

Tando, nos paret chi totu sos organismos numenados finas a como, diant dèvere leare in su sèriu (non pro nois ebbia ma finas pro èssere coerentes cun s'idea issoro) s'impòsitu de bogare a campu informatzione in sardu (normativu) e in italianu (si cherent). Si l'ant a fàghere, a su nessi ant a mustrare a beru chi sunt coerentes cando faeddant de soverania, autodeterminatzione, indipendèntzia.

Chi cumintzent giai dae como a fraigare soverania e a èssere indipendentes (in sa mente e in sa limba)! Cumintzent a s'autodeterminare a beru, dae como, a su nessi in sa limba!


#Diegu Corràine

» in segus