bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


05/08/2011

Formatzione in sardu de maistros e professores: la cherimus!

de Diegu Corràine

Sos istudiosos sardos e istràngios de sas Universidades ant tentu mèritos mannos pro sa connòschentzia de sas variedades de su sardu. E medas connoschèntzias linguìsticas las tenimus finas gràtzias a istudiosos no-universitàrios, chi a bias ant dedicadu sa vida issoro a sa limba sarda. 

A dolu mannu, però, su bonu de sos istudiosos universitàrios ant tratadu sa limba nostra belle semper comente ogetu de istùdiu, sena si nd'importare meda de sarvare, afortire, promòvere su sardu, pro li garantire tempus venidore. E tando non b'at de s'ispantare chi custu pessamentu, custu pistighìngiu de afortire su sardu e de praticare una polìtica e pranificatzione linguìstica, pro assegurare a sa limba nostra vitalidade e ufitzialidade in sa sotziedade e in su territòriu, siat istadu de sos "militantes", chi ant leadu e imparadu matèrias linguìsticas pro addatare sa limba a custa finalidade noa de su sardu, chi de seguru est una posta noa de sa sotziedae sarda de oe.

E tando non nos devimus mancu ispantare chi, a su sòlitu, s'Universidade in Sardigna no apat mai agiuadu in manera crara e determinada (si no at contrariadu), in sos ùrtimos annos, su protzessu de istandardizatzione e modernizatzione de su sardu, pro l'addatare a cale si siat àmbitu e impreu. Làstima, ca a su presente e venidore de sa limba sarda s'Universidade diat servire. Diat servire chi siat capatza de afrontare sa modernidade. Diat servire chi in s'Universidade b'apat dipartimentos mannos destinados a s'apoderare de sa limba e a imparare sa limba. Diat servire chi sos giòvanos, ma finas maistros e professore in servìtziu, potzant sighire matèrias noas: tradutologia, tradumàtica, terminologia, didàticas de sa limba sarda, etc. E chi custas matèrias siant fatas finas in sardu.

Est craru chi, si totu custu mancat, no est neghe de s'Universidade ebbia, est neghe de sa polìtica, sarda in particulare, chi no isfrutat totu sas prerogativas chi tenet (e àteras chi diat pòdere pretèndere). Ma sa polìtica a sa sola non faghet nudda, si non b'at unu movimentu de pressione e de proposta, mannu e trasversale, ca sa limba no est nen de dereta nen de manca. Pro custu, nos moimus!

Ma cando sa polìtica tenet sa voluntade, sas ideas craras (e su dinare!) pro intervènnere in contu de limba sarda, comente est capitadu urtimamente cun su Pianu triennale 2008/10, s'Universidade non si podet pònnere contra, pro difèndere interessos suos o cuare debilesas o incapatzidades. S'Universidade devet fàghere sa parte sua. B'at una parte manna de giòvanos sardos chi non cheret abbarraree nen firma ne a sa muda.

[dae EJA 5, làmpadas-trìulas 2011]


#Diegu Corràine

» in segus