bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


30/06/2011

TEMPUS DE NATZIONES

de Diegu Corràine

Mescamente in custos meses semus assistende a cambiamentos mannos, finas in intro de Europa. Si sunt isvilupende e afortende sos movimentos chi reclamant su “deretu de detzìdere”, de fraigare unu modellu de sotziedade chi tèngiat in contu non sos deretos individuales ebbia ma mescamente sos colletivos. Est semper prus forte s’idea chi sos istados mannos non sunt a tretu de guvernare sa sorte de sas natziones e de sos territòrios e de s’ambiente in ue custas comunidades istant e cherent istare. Est tempus de natziones, duncas! 

E si sunt isvilupende formas noas de organizatzione de custas ideas, prus pagu formalizadas e istruturadas. Sunt prevalende sas batallas trasversales chi obeint a unu Progetu e no a sas lògicas de podere de sos partidos traditzionales. Sas organizatziones prus abbistas l’ant cumpresu e lu sunt pratichende in Catalugna, in Paisu Bascu e in aterue. 

In Sardigna diat pàrrere chi siamus parte de custu mundu de natziones chi si sunt moende e sunt faghende caminu. Ma gosi no est, e bastat a bìdere su resurtadu (mìnimu) cando su movimentu natzionale sardu si ponet in eletziones, ma cun una programa ispiradu prus a sas ideas sotziales e ambientalistas de unu cale si siat movimentu italianu, ma sena una “idea natzionale”. In prus, presentende·si belle semper in italianu, cando est chi ant a tènnere un’identidade diferente? O pessant a beru, comente narat calicunu, chi, in sardu, sa gente non cumprendet o est prus pagu de acordu? A dolu mannu, belle totu custos movimentos cunsiderant sa limba sarda petzi comente istrumentu de sa gherra polìtica e non comente motore. Nois nos timimus chi su movimentu polìticu est dèbile ca no est tzentradu in sa limba e in s’idea natzionale, e chi sa limba est dèbile ca mancat su movimentu polìticu capatzu de cumprèndere custu ligàmene. No est sa voluntade e mancu s’onestade personale chi mancant. Mancat coerèntzia, costàntzia, perseveràntzia, duncas unu Programa fundadu in sa “idea natzionale”, chi sùperet personalismos, gelosias e sa cuncurrèntzia intre organizatziones. 

[dae EJA maju 2011]

#Diegu Corràine

» in segus