bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


13/06/2011

Su cuotidianu LA VANGUARDIA finas in catalanu. E sos nostros?

de Diegu Corràine

Dae su 3 de maju coladu, sos abbonados de LA VANGUARDIA (cuotidianu publicadu in Bartzellona, de ideas liberales, fundadu in su 1881) ant retzidu cun entusiasmu sa noa chi su cuotidianu essiat finas in catalanu. Unos 20.000 abbonados (de sos 65.000 chi tenet), ant pedidu de colare deretu a s’editzione catalana. Forsis 30.000 a sa fine de maju. 

Càrculant chi sas còpias de sos cuotidianos in catalanu (Avui e El Periódico, sos prus importantes) ant a colare intro de pagu tempus dae sas 250.000 de como a sas 600.000. 

E sos nostros? Semper in italianu! Mai siat chi essant in sardu, ca tantu no interessat a nemos, narat calicunu. Carchi bia essit una pàgina pagada dae sa Ras. Ma cando nemos ponet dinare, torrant a s’italianu. 

A nois non nos paret beru chi semus resessende a essire in sardu cun EJA dae unos cantos meses. E a canta gente arribbat? A 1000 pessones, forsis. E cantos lu leghent? Forsis totus sos chi lu leant de badas in sas librerias, o forsis petzi 100 o forsis 3000! Ca sa gente no est alfabetizada in sardu, connoschet agigu su limbàgiu de sa bidda sua e no est acostumada a lèghere in sardu. E finas ca su bonu de sos istudiados sunt contàrios a sa limba iscrita e iscaminant sa gente normale narende chi sa limba chi impreamus est una “limba de plàstica”. E s’issoro, s’italianu, de ite diat èssere? De oro, de prata, de ferru o de plàstica finas issa! Sena numenare sas fortzas polìticas e culturales, autonomistas o indipendentistas chi siant, chi, a paràulas sunt in favore de su sardu, ma belle semper òperant in italianu e non faghent perunu isfortzu de publicare sa propaganda o a su nessi unu fogigheddu in sardu. 

Siat comente si siat, a èssere solos o belle, publichende in sardu informatziones e ideas, no est una cosa bona. Su pòpulu e sa limba nostra mèritant de prus.

#Diegu Corràine

» in segus