bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


17/05/2011

Inidipendentismu sardu e votatziones

de Sarvadore Serra

In custas dies semus assistende a manifestatziones mannas de euforia dae bandas de unas cantas formatziones indipendentistas de Sardigna. Sa resone, sos resurtados de su  referendum contra a su nucleare, in ue una cantidade manna de pessones est andada a votare, cun pertzentuales “bùlgaras” contra a su de fàghere in Sardigna tzentrales nucleares e/o depòsitos de iscòrias radiuativas. E finas a como non b’at de s’ispantare. Totus amus torradu alenu e nos semus prenados de alligria cando amus ischidu chi bi fiat su quorum e chi, duncas, si nch’istesiaiat su perìgulu de  una cundenna terrorosa pro sa terra nostra. A sa fatza de Silvio Berlusconi e de Margherita Hack. Non nos torrant sos contos, però, cando si presentat custu resurtadu comente una vitòria estremorosa de su movimentu indipendentista. Oh, pro caridade, non nche cherimus catzare su meritu a chie, indipendentista, at fundadu su comitadu contra a su nucleare e at peleadu meda a beru pro otènnere custu resurtadu. Però, forsis, b’at àteros fatores chi ant agiuadu custu èsitu bonu. A proamus a nde mentovare calicunu? De seguru at influidu s’iscaddàntzia de cosas capitadas a largu (Fukushima) e a curtzu (Chirra), ca at postu a tìmere totu sos sardos, sena distintzione de orientamentu polìticu. A custu b’at de agiùnghere unu clima chi no est pròpiu in favore de su guvernu istatale. In fines, sa Regione sarda at dadu un’agiudu “tècnicu” mannu a sa pelea  antinucleare, acorpende sa consultazione referendària cun sas eletziones amministrativas, e dende un’informatzione costante in sos giornales. Duncas, podimus pessare chi sa resessida bona  de su referendum est una vitòria de “totu” sos sardos, indipendentistas, autonomistas  e finas “unionistas”. Tropu malos semus? Tropu tirriosos? Tando, proemus a fàghere s’iscumprou cun sas eletziones amministrativas fatas in sas matessi dies. Sa veridade est chi s’indipendentismu ocannu at fatu una ruta mala. Si est beru, difatis, chi cada partidu (e prus e prus unu partidu chi cheret fàghere nàschere un’entidade istatale noa) punnat a guvernare, non si podet pessare de otènnere custu resurtadu si non si bidet a su nessi una dinàmica de crèschida. E custa dinàmica non b’est, antis, si registrat unu minimòngiu de votos, si cunfrontamus sas pertzentuales de custas dies cun sas de sas eletziones de s’annu coladu. E tando, ite tocat a fàghere? A pàrrere meu, pro fàghere crèschere s’idea indipendentista non bastat a fàghere totu sas revindicatziones chi podet fàghere cale si siat partidu. Unu partidu sardu devet tènnere unu valore agiuntu. Custu valore est s’identidade. E cumponentes de s’identidade sunt in primis sa limba e s’istòria, chi faghent sa Sardigna diferente dae sas àteras regiones de s’Istadu. Si non faghimus gasi, amus a fàghere puru batallas bonas e giustas, ma chi non nos ant a fàghere distìnghere dae sos “birdes” italianos, dae sos “grillinos” italianos e totu gasi. E duncas sos sardos ant a gherrare intendende·si “sardi e italiani”, sena essire dae s’autonomismu traditzionale e sena pessare a beru a creare un’Istadu indipendente.

#Sarvadore Serra

» in segus