bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: Pàrreres
cumpartzi custa noa cun sos amigos tuos invia mail stampa

Pàrreres


08/05/2011

Universidade de Casteddu pro su sardu. E sa de Tàtari?

de Diegu Corràine

Presentadu su 8 de abrile, in Casteddu, su Progetu FILS  (Formatzione de Insinnantes in Limba Sarda) de s’Universidade de Casteddu.

Sa Regione, de acordu  cun sa  Diretzione Iscolàstica Regionale, at incarrigadu sa facultade de Lìteras  e Filosofia de s’Universidade  de Casteddu  de  formare unu nùmeru mannu  de dotzentes  chi si chèrgiant  impinnare in sa trasmissione intergeneratzionale in sa didàtica de sa limba  de identidade istòrica  de s’ìsula. Su progetu at a tènnere sa durada  de unu triènniu e si proponet de interessare  a su nessi  200 insinnantes de  rolu de sas iscolas de cada  òrdine e gradu e de diferentes deghinas de  espertos  esternos. Su laboratòriu  organizadu pro chenàbura  tenet pròpiu sa finalidade de isseberare  ideas , propostas  operativas  e interventos  pro  orientare in sa mègius manera  sas risorsas investidas  in su mundu de s’iscola  chi est connoschende, comente totus ischint, unu mamentu dramàticu.

“In sa Cunferèntzia  programàtica de pagos meses a como  in Fonne  - at sutaliniadu  s’assessore  de s’Istrutzione Pùblica, Sergio Milia - amus  faeddadu de s’issenàriu  difìtzile de sa chistione linguìstica de s’ìsula nostra e amus propostu unas cantas solutziones in s’àmbitu de  una situatzione econòmica mala de s’istrutzione regionale. So cuntentu  de pòdere nàrrere chi, in pagu tempus, dae sas promintas  semus colende a sos fatos”.

A nàrrere sa giusta, pro assegurare una presèntzia normale de su sardu in sa sotziedade e in su territòriu, bi diat chèrrere una polìtica linguìstica coerente e efetiva, cun milliones de èuros e personale preparadu. Ma tocat a cumintzare a su nessi cun su chi giai b’est. S’universidade de Casteddu est mustrende custa voluntade, superende sos lìmites de su folclorismu e de su culturalismu, chi est s’arriscu mannu cando si tratat de limba sarda. E s’Universidade de Tàtari ite faghet pro assegurare sa didàtica e s’ufitzialidade de su sardu? Finas a como, pagu o nudda!

#Diegu Corràine

» in segus