fradile

Su faeddu “fradile” benit deretu dae su latinu «frātruēlis» (cun càmbiu de desinèntzia) e inditat su fìgiu de unu tziu o de una tzia, parente.
Duncas dolet a lèghere e a intèndere narende “cuginu”, a s'italiana, chi s'est ispainende in totue, comente chi su sardu siat unu faeddu antigu, feu, lègiu, de si nde birgongiare.
In sardu tenimus una paràula chi assimìgiat a s'italianismu “cuginu”, ma tenet àteru valore. Si tratat de “cusinu”, chi benit dae su catalanu “cosí, cusí”, che derivat dae su latinu «consobrīnus» (=fradile), che a su frantzesu “cousin” e a s'italianu “cugino” (chi però derivat dae su frantzesu antigu “cosin”). In sas tres limbas tenet su valore de su sardu “fradile”, fìgiu de tziu o de tzia.
In sardu, però, “cusinu” inditat una pessone de “tzitade”, elegante e bestida a sa tzivile, es.: “est bestidu de cusinu”. Forsis leat custu valore dae su catalanu matessi, in ue “cosí” tenet finas su valore de “nobile”.

sorrastra

Sa matessi cosa podimus nàrrere pro su currispondente feminile “sorrastra” (finas “sorrestra” in logos medas de Sardigna), chi sa gente impreat semper de mancu, ca li preferint s'italianismu “cugina”. A dolu mannu, su cumplessu de inferioridade, giughet gente meda a impreare italianismos in càmbiu de faeddos sardos sìncheros.
“Sorrastra” benit dae su latinu «soror» (=sorre) + suf. «-astra(m)», forsis cunforma a su modellu “figiastra” da su latinu tardu «filiastra(m)».