bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


20/05/2013

PRÈMIU PINTORE DE GIORNALISMU IN SARDU

Proclamados sos binchidores, in Irgoli, su 18 de maju de su 2013


Sabadu 18 de Maju 2013, in sa sala cunsiliare de sa Comuna de Irgoli, a sas h. 18,30, sunt istados proclamados sos binchidores de sa prima editzione de su PRÈMIU PINTORE de giornalismu in sardu (in ammentu de su giornalista e iscritore Giuanne Frantziscu Pintore, mortu in su 2012): Rachel FALCHI de Tàtari cun un’artìculu chi faeddat de sos problemas de s’ambiente e de sas neghes chi nde tenet s’òmine), Lisandru BECCU de Silanos (cun un’artìculu chi tratat de su pastoriu eris e oe), Andria PIRA e Giosepe FRORE de Nùgoro (chi ant iscritu paris s’artìculu premiadu “S’Iscòtzia e sa prospetiva de indipendèntzia” ma non ant pòdidu èssere presentes). Sos binchidores ant retzidu 100 € peròmine de prèmiu e unu sìmbulu apòsitu in tzeràmica fatu dae s’artista Mimmo Bove. Sos tres artìculos premiados ant a èssere publicados in su rivista in sardu EJA.


In sa tzerimònia fiant presentes prus de baranta pessones: familiares de sos binchidores , sa famìlia Pintore, membros de sas Editziones Papiros, amigos de Giuanne Frantziscu Pintore, iscritores, giornalistas e amigos de sa limba sarda.

In antis de sa premiatzione, ant leadu sa paràula su sìndigu de Irgoli, Giuanne Porcu, su diretore editoriale de Papiros editzione, Diegu Corràine, s’artista Mimmo Bove, Càrminu Pintore e Annedda Muscau (fìgiu e mugere de GF Pintore).

Sos premiados sin sunt presentados faeddende de s’esperièntzia de su cuncursu, de sas dificultades de s’iscritura in sardu e de s’utilidade de isvilupare sa limba sarda finas in su mundu de s’informatzione.

In fines, ant ammentadu a GF Pintore sos amigos Antoni Granara e Antoni Marche.

Su PRÈMIU, organizadu dae sas Editziones Papiros, cun su patronadu de sa Comuna de Irgoli, at annuntziadu sa segunda editzione pro su 2014, semper in Irgoli. 


[in sa fotografia, dae manca, Diegu Corràine, Lisandru Beccu, Càrminu Pintore, Rachel Falchi]


#Diegu Corràine

» in segus