bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


08/01/2013

Mortu Antonio Cubillo, ideòlogu indipendentista de sas Ìsulas Canàrias

Su 10/12/2012, in Santa Cruz de Tenerife, a 82 annos.

Mancu unu mese a como, su 10/12/2012, est mortu in Santa Cruz de Tenerife, a 82 annos, Antonio Cubillo, s’ideòlogu indipendentista prus connotu e famadu de sas Ìsulas Canàrias. Cubillo, avogadu, at dedicadu sa vida sua a su bisu de s’indipendèntzia de sa Ìsulas Canàrias*, in ue istaiant sos Guanches (imparentados etnicamente, linguisticamente e culturalmente cun sos bèrberos de su nord de Àfrica), in antis chi sos Ispagnolos las aerent ocupadas definitivamente in su 1496 e nd’aeret isterminadu o assimiladu sa gente.

Antonio Cubillo, in su 1950, paris cun àteros militantes, aiat fundadu “Canarias Libre”, sa prima organizatzione natzionalista canària. A pustis si nche fiat fuidu a Algeria, in sos annos ’60, pro no èssere pessighidu e tentu dae sa politzia franchista (comente fiat capitadu a belle totu sos membros de su movimentu), e aiat fundadu in su 1964 su MPAIAC, Movimentu pro s’Autodeterminatzione e s’Indipendèntzia de s’Artzipèlagu Canàriu. Dae Algeri, in su 1975 aiat cumintzadu a trasmìtere (cun s’agiudu de su Guvernu algerinu) in Ràdiu Algeri, cun sa “Boghe de sas Canàrias Lìberas”. E pròpiu in cussa època si podiat ascurtare in sas undas curtzas de sa ràdiu, animende su pòpulu canàriu a si bortare contra a su domìniu ispagnolu. E pròpiu pro totu custa òpera de militante, in su 1978, in Algeri, emissàrios de sa politzia ispagnola aiant chircadu de l’ochìere. Nde fiat essidu biu ma fertu definitivamente e ammarturadu in parte. In su 1986, A. Cubillo fiat torradu a sas Canàrias e aiat fundadu su Cungressu Natzionale Canàriu (CNC), chi, però, in sas eletziones de su 1991 fiat resurtadu minoritàriu a beru.

Aiat sighidu a fàghere a avogadu e a s’interessare de linguìstica “guanche” (Nuevo análisis de algunas palabras guanches), sa limba de sos abitadores autòctonos de sas Ìsulas. 

Est istadu pròpiu Cubillo, cun totu s’atividade sua a internatzionalizare sa càusa canària.

In su 2003 sa Audiencia Nacional aiat cundennadu su Ministèriu de sos Internos ispagnolu a pagare un’indennizu de 150.000 èuros a Antonio Cubillo pro s’atentadu de su  1978!

Cubillo est istadu unu pessonàgiu importante in su mundu de sos movimentos pro s’autodeterminatzione de sos pòpulos. Pro custu, finas su Cussìgiu Federale e su Cungressu Mundiale Amazigh (Bèrberos) ant manifestadu su dolu issoro in ammentu de Cubillo rivolutzionàriu e natzionalista canàriu.

*S’artzipèlagu de orìgine vulcànica est postu in dae in antis de sa costa nordest de Àfrica, intre 27º37' e 29º25' de latitùdine nord e 13º20' e 18º10' de longitùdine ovest, tenet una populatzione de 2.126.769 abitantes, in unu territòriu de 7.447 km²


#Diegu Corràine

» in segus