bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


18/06/2012

Resessida manna de su Prèmiu Ostana dedicadu a sas iscrituras in limba materna

Ocannu fiat sa de tres editziones

Est andada bene a beru sa de tres editziones  de su  "Prèmiu Ostana" dedicadu a sas iscrituras in limba materna. L'ant fata a primos de custu mese de làmpadas, in sa  Sala Polivalente de sa Domo Comunale de Ostana, unu bidditzolu otzitanu  chi est mustrende cun sos fatos chi finas in sas comunas minores si podent ammaniare  manifestatziones internatzionales de valore culturale artu, de impinnu tzivile e èticu.

Sa prima die est intervènnidu Giovanni Agresti, ispetzialista de limba e literadura otzitana in s'Universidade de  Padova, chi at presentadu deghe atziones profetosas  pro su promovimentu de sa diversidade linguìstica;   pustis ant projetadu  su documentàriu  "Arte de sa bidda, arte de s'addòviu" de Simone Del Grosso.

Sa sessione "A chistione cun sos autores " nos at introduidu in su  tema dedicadu a sas iscrituras in sas limbas maternas: a pustis de su majorchinu Maite Brazales (Prèmiu giòvanos) chi at faeddadu cun  Maurizio Gnerre de s'amore de sorres de sas limbas otzitana e catalana, b'at àpidu sa presentada  de su segundu volùmerne de sa sèrie  "Escrituras" cun su libru de  Harikatz Cano "Su filu de erba" bortadu dae su bascu dae Maria Teresa Atorino e Roberta Gozzi, publicadu dae sa  Chambra d'oc. 

A merie b'at àpidu un'arresonada intre s'iscritore  Joseph Zoderer (Prèmiu Natzionale) e Annibale Salsa subra de su fatu de èssere iscritores  in unu territòriu de làcana  linguìstica e culturale  e culturale comente su Sudtirol. e pustis b'at àpidu s'interventu de sa  sami Vuolab Kerttu autora, poeta, tradutora, illustradora, imbentora de paràulas, crèschida in sa Lapònia Finlandesa.

Su restu de su merie e su sero sunt istados dedicados a Sergio Salvi , autore de "Le lingue tagliate" e de "Le nazioni proibite", chi l'ant  dadu su Prèmiu Ispetziale  pro s'impinnu suo chi punnat a fàghere connòschere su tema de sas natziones proibidas, de sas limbas  sena Istadu,  . 

S'incras, a pustis de una vìsita  a sos progetos innovadores  de Ostana, Fredo Valla at faeddadu cun Diegu Corràine (Prèmiu tradutzione), esponente de su natzionalismu sardu. Su tema est istadu "Sardos e otzitanos: òmines e istòrias a cunfrontu".

A merie b'at àpidu  un'ispetàculu in omàgiu  a sa poesia de Sergi Bec (Prèmiu pro sa limba otzitana), postu in òpera dae Renat Sette (boghe), Diego Lubrano (chitarra), Aurélie Lombardo (organeddu) cun sa regia de Bruno Delau. 

In fines, b'at àpidu sa tzerimònia de premiatzione  contivigiada dae Carlo Cerrato, chi l'ant trasmìtida in direta web tv in su situ www.chambradoc.it


#Sarvadore Serra

» in segus