bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


19/01/2012

Est mortu Txillardegi, iscritore e linguista bascu, unu de sos fundadores de ETA

Teniat 84 annos. Aiat imbentadu isse su nùmene Euskadi ta Askatasuna

José Luis Alvarez Enparantza, prus connotu cun su paranùmene de "Txillardegi", est mortu a 84 annos de edade in Donòstia (San Sebastian), su 14 de custu mese, in Paisu Bascu.
Nàschidu su 27 de cabudanni de su 1927, ingenieri e linguista, est istadu unu de sos fundadores de ETA e de Herri Batasuna (senadore in su 1978)e unu de sos teòricos prus famados e abbistos de su natzionalismu bascu modernu, paris cun Federico Krutwig Sagredo, autore de Vasconia, libru clàssicu de su natzionalismu bascu.

Comente iscritore, est cunsideradu su primi chi, cun s'opera Leturiaren Egunkari Ezkutua (Su diàriu cuadu de Leturia, 1957) at iscritu su primu romanzu modernu in euskera, ponende su fundamentu de sa narrativa basca noa

Fiat intradu in su 1957 in sa Academia Basca de sa Limba, Euskaltzaindia, e aiat agiuadu a dare forma a su euskera batua, forma unificada de su bascu, partzidu in dialetos medas.

Impresonadu prus de una bia e esiliadu durante s'època franchista, fiat istadu pròpiu Txillardegi a isseberare su nùmene de ETA (Euskadi e libertade).

Est istadu finas professore in s'Universidade basca.

Comente at naradu bene Xabier Kintana, segretàriu de Euskaltzaindia: "Isse at cambiadu in manera crara su sàmbene e sos sambenados cun s'elementu culturale e linguìsticu comente base natzionale basca. Aiat difesu s'idea chi chi est bascu chie connoschet sa lomba basca e assìmilat sa cultura basca, sende chi potzat èssere de aterue su sambenadu e s'orìgine". Txillardegi matessi, chi aiat imparadu su bascu a sos 20 annos de edade, est istadu una mustra contra a s'idea chi su euskera (limba preindoeuropea, tocat a l'ammentare) fiat malu a beru a imparare.

Pro chie l'at connotu, che a nois, est una pèrdida manna, in parte minimada dae su fatu chi sas ideas suas in contu de polìtica e de limba si sunt ispartzinadas in totue, finas foras de Euskadi, dende ideas a prus de una leva de giòvanos militantes natzionalistas.

Ammentamus finas chi Txillardegi fiat su babbu de Joseba Álvarez, dirigente de su natzionalismu bascu de sinistra, bènnidu a Sardigna prus de una bia pro presentare sa chistione basca. Interessante meda custa intervista a sa Nuova Sardegna: «La lingua e la cultura basca segni della nostra identità», 11.9.2006. 

#Diegu Corràine

» in segus