bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


15/10/2011

Pro una rete  de sas minorias linguìsticas

Addòviu importante in Vich

Sunt dòighi, in Itàlia,   sas limbas reconnotas dae Lege istatale n. 482 de su 1999: Sardu, Albanesu, Catalanu, Croatu, Frantzesu, Francu-proventzale, Friulanu, Germànicu, Gregu, Ladinu, Otziitanu, Islovenu. Diàlogu e cooperatzione nde podent aumentare sas possibilidades  de supravivèntzia. Nd'ant faeddadu in custas dies  in  Vich, (Vigo di Fassa, in italianu) in ue ant ammaniadu, in su museu Ladin de Fascia, cuidadu dae su Servìtziu pro su promovimentu  de sas minorias  linguìsticas locales de sa Provìntzia autònoma de Trento, s'addòviu cun su tìtulu  "Su valore de sa collaboratzione - Cara a una rete pro sas minorias linguìsticas".

Sa manifestatzione  teniat s'obietivu  de promòvere  una rete de sas minorias linguìsticas chi, colende·nche sas distàntzias  e sas dificultades comunicativas, potzat agiuare  sos cuncàmbios  e sas ocasiones  de addòviu, e fatzat   prus fàtziles  e profetosas sas possibilidades de relatzione. S'inghìriu de sas ideas, s'intercàmbiu de esperièntzias, sa  cooperatzione rapresentant sas istrategias  in ue fundare  sas relatziones  intre comunidades  de minoria linguìstica pro sa supravivèntzia  de sas limbas prus pagu difusas  de sas realidades  sotziales e culturales ligadas a issas.

Su tempus venidore de sas limbas prus pagu difusas, custa est s'idea, podet bogare profetu  dae una rete de cuntatos  chi punnat a agiuare  sa connoschèntzia  e sa difusione de esperièntzias positivas  in setores de sa vida sotziale che a s'iscola, sa cultura, s’informatzione, ponende sas bases pro un'atzione de coordinamentu  interregionale in favore de sas comunidades  de minoria linguìstica. Custas temàticas las ant aprofundidas  suta de su profilu  antropològicu, culturale e polìticu , cun s'idea  de pònnere in craru sos vantàgios  e sas oportunidades  chi benint dae sa collaboratzione, dae su cuncàmbiu de  connoschèntzias e de esperièntzias.

Un'atentzione particulare l'ant dedicada  a sa comunicatzione, mèdiu chi non si nde podet fàghere a mancu  pro sensibilizare su pùblicu, de sas minorias e non solu. Propostas medas sunt essidas a campu  pro potentziare custu setore , finas ponende in campu sas tecnologias noas. In fines ant cuncordadu de fàghere nàschere una prataforma  pro  totu sos chi ant a chèrrere adderire e creare una base de datos  intre sas minorias a manera de fàghere girare  sas informatziones  e sos cuntatos  in manera capillare.


#Sarvadore Serra

» in segus