bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


Beranu Literàriu 2008

Un´ocasione pro connòschere òperas e autores de literadura in limba sarda

Su Beranu Literàriu est istada una initziativa chi in sos meses de maju e de làmpadas at fatu connòschere in sete biddas de Ogiastra e àteras biddas a probe de Tàtari, romanzos e autores in limba sarda. S´ùrtimu addòviu est istadu peri ocasione pro faeddare de s´editòria in limba sarda cun sos editores Diego Corraine, "Papiros", e Frantziscu Cheratzu, "Condaghes", chi ant faeddadu de sas dificultades de su setore chi, oe, campat sena una polìtica istratègica regionale de finantziamentu de s´editòria in limba sarda. Mancari gasi, su chi essit a campu est chi su setore est biu meda e, francu sos autores in italianu prus connotos e prus numenados dae sa publitzidade, chi a su sòlitu bendent prus còpias de sos àteros, sos libros in sardu bendent in Sardigna belle cantu a cussos in italianu.

Interessante est istadu a pòdere connòschere diretamente sos autores chi, ponende a bandas s´umanidade e sa cumpetèntzia literària, ant mustradu chi sa literadura in limba sarda no est literadura de "serie B" comente diant pessare in medas e no est mancu una literàdura de contos de foghile, de bandidos o contos de massajos e pastores. Est una literàdura bia, presa a sos tempos nostros, chi tratat temas de importu, chi trasmitit balores e connoschèntzia, mustrende chi in limba sarda si podet iscrìere e faeddare de totu.

Su chi ispantat est sa capatzidade de sos autores de colare cun grabu dae temas locales a temas universales. Si tratant temas chi podent èssere a curtzu e de cada die, de s´omossessualidade in Sardigna in sos annos trinta e in dies de oe, ma peri de fatos comente sa gherra in Jugoslàvia in Sa sedda de sa passalitorta de Gonario Carta Brocca. Si faeddat de sas peleas de sos istudentes in sos annos ´70 in Itàlia e in Sardigna in Sa janna tancada de Nanni Falconi, pastore-iscritore cun sa passione pro internet. Non mancat su romanzu istòricu, Sos de parte tzier, de Costantina Frau, subra sa Sardigna de su 1600 a su cumintzu de sa dominatzione catalana. Sena ismentigare s´Antonandria dePaulu Pillonca, sos contos de cullègiu de Nino Fadda in "Presones deLussu", Dona Mallena de Larentu Pusceddu e G. Tirotto chin L´umbra di lu soli iscritu in gadduresu-casteddanesu.

Sos addòvios sunt istados sighidos cun grandu interessu in totu sas biddas e s´Ogiastra e àteras bidda a probe a Tàtari si sunt mustradas atentas e interessadas a totu sas chistiones chi pertocant sa limba sarda ma mescamente s´identidade nostra.

 

 

 


#Sarvadore Serra

» in segus