bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


07/01/2009

Binchidores de "Iscrie una lìtera a sos Tres Res"

Fonne | 6-1-2009 | 17 annos de cuncursu pro afortire s'impreu de su sardu in sos pitzinnos

Finas ocannu, sos iscolanos de sas iscolas elementares sardas ant sighidu su bandu de sos Tres Res e de sos organizadores de su cuncursu "Iscrie una lìtera a sos Tres Res", arribbadu a 17 editziones.
Su manifestu de su 2009 l'at illustradu, che a semper, s'artista friulana Pia Valentinis, chi istat in Casyeddu oramai dae annon meda.
Comente si bidet in unu particulare de sa figura, rapresentat sos Tres Res chi sunt navighende in mesu de undas artas artas, ghiados dae s'Isteddu. Pro mustrare sa voluntade umana de operare in favore de su bene, mancari b'apat in su mundu cada genia de dificultade.

Su cuncursu, cumintzadu in Ovodda, at biagiadu in medas biddas sardas, finas a arribbare a Fonne s'annu passadu, punnat a animare sas famìlias, s'iscaola e mescamente sos pitzinnos a faeddare, iscrìere e istudiare in sardu. Ca totus ischimus chi una limba at a èssere bia mescamente si est trasmìtida dae una leva a s'àtera. Trasmissione chi est semper de prus in dificultade , si leghimus sos istùdios fato dae sa Regione sarda como duos annos.

Mancari apamus iscobertu chi petzi su 13% de sos pitzinnos pràticant sa limba sarda, a cunfrontu de su 70% generale (mescamente gente manna, duncas), antis pròpiu pro custu, sos chi creent in su tempus benidore de su sardu e sos Tres Res sighint a propònnere cada initziativa possìbile pro afortire su sardu.
Duncas, sunt istadas 530 sas lìteras arribadas in sas dies coladas a sos Tres Res, in sardu, dae 35 biddas sardas. E binti sunt sos autores premiados, chi ant retzidu su còngiu de tzeràmica prenu de tziculates e caramellas chi oramai est su sìmbulu de su cuncursu. In prus, sos premiados, paris cun àteros 60 pitzinnos chi ant imbiadu lìteras chi sa giuria at sinnaladu, ant a èssere premiados cun sa publicatzione in unu libru chi at a èssere publicadu annoas.

Sa giuria formada dae Mariolina Mannia, Tonino Bassu, Gianfranco Pinna, Diego Corraine, Franca Piras, Giannetto Visentini, at premiadu Angelica Olla de Biddanoa Strisaili, sa classe 3a de Thiesi, Luca Carboni de Tonara, Nirosha Fois de Lùvula, Patrizia Mureddu e Nicolas Gregu de Fonne, Antonio Mele de Irgoli, Veronica Mereu e Matteo Scudu de Biddamanna Strisaili, Maddalena Olzai e Nora Ena de Bitzi, Bernardette Talanas e Giusi Contu de Orune, Alessio Lai de Ulassa, Alessia Gungui de Orgòsolo, Martina Murru de Tìana, Geremia Cantaro de Nughedu S. Nicola, Francesco Sale de Durgali, Francesco Filindeu de Garteddi, Jessica Deiola de Useddus. Totu sos premiados ant lèghidu sa lìtera premiada a unu pùblicu de prus de 300 pessones, formadu dae babboes mamas de sos pitzinnos, dae maistros e maistras e dae gente de sa bidda de Fonne.

Sa premiatzione l'ant fata in Fonne su 6 de ghennàrgiu, in su salone parrochiale.
Ant presentadu sa manifestatzione su rapresentante de s'Unicef Carlo Murgia. Sa premiatzione l'at fata Mariolina Mannia. Ant cungiadu su sìndigu Antoninu Coinu, s'assessore de sa cultura Istene Busia, Pedru Putzu e Giannetto Visentini de s'Unicef, Diegu Corràine de Papiros.

In fines, totus ant retzidu in donu su libru chi at publicadu sas lìteras premiadas e sinnaladas s'annu passadu.

[red]

#Sarvadore Serra

Sos pitzinnos
premiados
Su pùblicu
chi at sighidu sa premiatzione
Nashira, una pitzinna de Sri Lanka chi istat in Lùvula
chi at imparadu bene a beru su sardu
SOS TRES
RES
» in segus