bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


18/09/2008

Nàschidu su "Comitadu 482, pro sa ufitzialidade de sa limba sarda"

Su prus de sos membros sunt operadores de sos isportellos linguìsticos

Eris, 12-9-2008, in Bilartzi, sos partetzipantes a su cursu de autoformatzione promòvidu dae s'Ufìtziu de sa Limba Sarda de sa Provìntzia de Aristanis ant leadu s'impinnu de formare unu COMITADU pro afortire su movimentu in favore de s'ufitzialidade de sa limba sarda comente est cuntempladu in sa Lege 482 de su 1999 de sa Repùblica Italiana.

Si tratat de un'assòtziu lìberu, ispontàneu e informale, non ligadu a perunu ente o movimentu, chi tenet comente finalidades fundamentales:
—operare pro s'aplicatzione cumpreta de sa Lege 482 (dae como in antis "sa Lege")
—controllare chi sos disinnos e sas atziones de sos Entes siant coerentes cun sa Lege matessi
—informare s'opinione pùblica de sos isvilupos, de s'aplicatzione e finas de sa "no aplicatzione" de sa Lege
—leare initziativas de sensibilizatzione in favore de s'aplicatzione de sa Lege
—fàghere pressiones, propostas, a sos Entes, a sas Istitutziones e a sos partidos polìticos
—controllare sos efetos de s'aplicatzione de sa Lege e manifestare sos atentados a sa Lege
—leare finas initziativas legales pro difèndere s'aplicatzione coerente de sa Lege.

Su nùmene provisòriu de s'assòtziu est "Comitadu 482, pro s'ufitzialidade de sa limba sarda"
S'assemblea provisòria de su C482 est formada dae sas pessones chi ant dadu sa disponibilidade issoro su 12-9-2008
S'organizatzione de su Comitadu482 e finas sas finalidades craras ant a èssere detzìdidos dae sa prima assemblea de sos membros chi at a èssere autocunvocada dae s'Assemblea provisòria.

Cale si siat integratzione, cussìgiu o proposta, at a pòdere èssere imbiada dae sos iscritos a custu blog.

Pro como, e finas a una detzisione contrària, podent imbiare:
—Cumentos a sas "lìteras impostadas" a su blog: chie si siat
—Lìteras: sos iscritos a su C482

Si ses interessadu a leare parte in su Comitadu 482, iscrie a:

comitadu482@gmail.com 

e sighi su blog
http://comitadu482.blogspot.com/

[Diegu Corràine]



#Sarvadore Serra

» in segus