bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


09/09/2011

Nono a cambiare su modellu de immersione linguìstica!

Sa Generalitat de Catalugna contra a su Tribunale Superiore de Giustìtzia

Sa Generalitat de Catalugna est gherrende a sa prus arta pro parare fronte  a su Tribunale Superiore de Giustìtzia de Catalugna e mantènnere sena cambiamentos  su modellu  de immersione linguìstica  chi custu organismu at postu in discussione. Sa contraofensiva, ghiada dae su  presidente de su  guvernu catalanu, Artur Mas (in sa fotografia),  de Convergència i Unió, s' isvilupat  in duos frontes: su fronte giuditziale, neghende a su Tribunale sa cumpetèntzia pro pretèndere  modìficas de una lege in vigore; e su fronte polìticu, tenende contu de sas netzessidades  de sa Moncloa venidora. CiU at a sighire a cunfiare in su PP in Catalugna, sòtziu preferidu de su guvernu in minoría. Però su PP forsis no at a pòdere cunfiare  in CiU in parlamentu in sa legisladura beniente, cando su partidu ghiadu dae Rajoy podet tènnere bisòngiu de si pònnere de acordu  cun sos natzionalistas, si binchet sas eletziones sena otènnere sas majoria assoluta.

“Cunforma a su chi faghet   su PP cando andat a su guvernu de Ispagna, cun CiU e cun su guvernu atuale  de sa Generalitat at a tènnere pagu de ite fàghere”, at craridu Mas. “Sunt annos chi nos ponent su tocu cun sa chistione de su catalanu. Ant a dèvere isseberare”, at agiuntu, abertende sa ghia polìtica de su PP a no impitare s'immersione linguìstica comente istrumentu de propaganda  o ogetu de ricursos giuditziales. Su PP catalanu in su 2009 aiat fatu ricursu contra a sa  Lege de Educatzione de Catalugna (LEC) aprovada cussu matessi annu, e  Mas cheret èssere seguru  chi su partidu ghiadu dae Rajoi non fatzat àteras atziones cun s'agiudu de su Tribunale Superiore. S'abertimentu  at funtzionadu: pagas oras a pustis, su vitzesegretàriu   de sa comunicatzione de su PP, Esteban González Pons, at asseguradu dae  Madrid chi “su PP cheret abbarrare a curtzu meda a CiU. “Non cherimus subordinare su dibàtidu  subra de sa creatzione de postos de traballu  a perunu assuntu  chi nos potzat ischirriare”, at craridu.

A pàrrere de su  PP,  sa LEC “lìmitat” sos deretos linguìsticos de sos tzitadinos   in sa comunidade  e non promovet   “unu modellu de sotziedade aberta”. Però su guvernu tzentrale at naradu  chi sa lege catalana est cunforme siat a sa Costitutzione siat a s'Istatutu catalanu. Sa LEC, pro parte sua,  tenet fundamentu in sa  lege de polìtica linguìstica aprovada in su 1998 suta de su guvernu  de su PP in su primu mandadu  de s'ex presidente  José María Aznar, chi l'aiat cunsiderada costitutzionale. Su PP teniat bisòngiu finas tando de  sos votos de CiU pro guvernare.

Sa Generalitat si fundat in custa lege pro mandare a dae in antis  sa defensa giuditziale sua. Gasi crarit in su ricursu   chi at presentadu a su Tribunale  pro andare contra a su providimentu chi ponet s'ispagnolu  comente limba veiculare in sas iscolas. Custu tribunale, sustenent sos servìtzios giurìdicos de sa  Generalitat, non tenet cumpetèntzia  pro obligare  a modificare unu modellu linguìsticu chi derivat  dae una lege in vigore, aprovada dae sa  Generalitat e ratificada dae su guvernu tzentrale. “Devimus crarire cale òrganu  tenet potestade pro modificare  sa Lege de Educatzione”, at naradu sa cussigera  de su Dipartimentu  de Insinnamentu, Irene Rigau. “Unu giùighe no nche podet bogare una lege”, at agiuntu, sighende sa matessi lìnia, Mas.

 


#Sarvadore Serra

» in segus