bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


10/08/2011

Abertu s'Ufìtziu de sa limba sarda in sa Provìntzia de Terranoa-Tèmpiu

Est un'isportellu itinerante e interessat 13 comunas de sa Provìntzia

In su mese de maju sa Provìntzia de Terranoa Tèmpiu at ativadu s'Ufìtziu de sa limba sarda cunforma a sa lege istatale de tutela de sas minoria linguìsticas (lege 482/1999).

S'Ufìtziu est un'isportellu itinerante e interessat 13 comunas de sa Provìntzia e sunt Tèmpiu, Badesi, Alà, Buddusò, Belchidda, Monte, Budune, Figari (Golfo Aranci), Locusantu, Padru, Sant'Antoni, Lungoni, Santu Diadoru. S'Ufìtziu tenet comente obietivu printzipale su de dare assistèntzia in s'impreu ufitziale de su sardu, de consulèntzia a sas amministratziones comunales, a sas istitutziones iscolàsticas, a sos assòtzios, a sos tzitadinos pro sa promotzione e s'impreu de sa limba sarda in totu sos àmbitos e in totu sas ocasiones de vida polìtica, sotziale, econòmica, amministrativa e culturale.

Su progetu cheret promòvere s'impreu orale e iscritu de sa limba sarda siat in intro de s'amministratzione siat in sos raportos cun sos tzitadinos e in su matessi tempus bolet favorire e valorizare finas sa limba faeddada in custu territòriu, su gadduresu. At a èssere còmpitu de sa responsàbile de s'Ufìtziu linguìsticu provintziale, Juvanna Tuffu, istudiosa de limba sarda, a  fàghere initziativas de valorizatzione siat de su sardu e finas de su gadduresu tràmite addòvios, cunferèntzias, presentatzione de libros e proietzione de cortometràgios a manera de mustrare comente s'impreu de una limba minoritària comente su sardu o su gadduresu, potzat èssere "normale" non setzi in àmbitu familiare, ma finas in sos cuntestos formales comente in sos ufìtzios pùblicos e in sa vida de cada die, pro nàrrere in sas iscritas de impreu pùblicu comente avisos a su pùblicu de gènere diferente, ordinàntzias, delìberas, ma finas locandinas, targhetas, publitzidade, giornales ecc. Juvanna Tuffu est finas responsàbile de s'Ufìtziu de sa limba sarda de sa comunas de Tèmpiu, Badesi, Monte, Belchidda, Budune e Padru. Daniela Masia est sa responsàbile de s'Ufìtziu de sa limba sarda de sas comunas de Figari, Locusantu, Sant'Antoni, Lungoni, Santu Diadoru, Alà e Buddusò.

S'Ufìtziu de sa limba sarda ets abertu a su pùblicu in custas dies: in Tèmpiu su lunis de sa prima e de sa de tres chidas de su mese (dae sas 9,00 a sas 14,00), in Monte su martis de sa prima e de sa de tres chidas de su mese (dae sas 9,00 a sas 14) e su primu mèrcuris de su mese; in Belchidda su martis (dae sas 14.30 a sas 17.30) e sa giòvia (dae sas 9 a sas 14) de sa prima chida de su mese e sa giòvia de sa de tres chidas de su mese; in Terranoa sos mèrcuris de su mese e su martis de sa segunda chida; in Padru su mèrcuris de sa segunda chida de su mese e sa giòvia de sa de bator chidas de su mese; in Budune sa giòvia de sa segunda chida de su mese (dae sas 9 a sas 14); in Badesi su lunis de sa de duas e de sa de bator chidas de su mese.

S'ufìtziu tenet finas un indiritzu de posta eletrònica: 

ufitziu.terranoa.tempiu@gmail.com


#Juvanna Tuffu

» in segus