bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


01/07/2011

Limba sarda in sos protzessos

S'avisu de sa Procura de sa Repùblica a Ddoddore Meloni

Sa Procura de sa Repùblica de Aristanis at notificadu in limba sarda s'avisu  de agabbu  de sas indàgines preliminares   a s'indipendentista  Doddore Meloni, 68 annos, incurpadu de evasione fiscale paris cun sa fìgia e de  bancaruta fraudolenta e fràude in cummèrtziu, a pustis de un'inchiesta  de sa guàrdia de finàntzia. Est in sardu finas sa relata de notìfica de s'avisu. L'aiat  pedidu Meloni etotu. Lu previdet s'art. 109 de su còdighe de protzedura penale.
  "Leo atu  de sas acusas  in ogetu in unu documentu ufitziale de sa Procura de Aristanis in limba sarda", narat s'indipendentista, chi sos finantzieris li ghetant in cara intradas non decraradas pro prus de  5 milliones e una  decraratzione mancada  de s'Iva pro àteros 750mìgia  de èuros. "Custa notìfica  dat a mie e a totu sos sardos , chi cumprendent s'importàntzia de  custu atu, unu cuntentu mannu. Dae su puntu de vista meu, sa Sardigna est essende  dae unu tempus de tzerachia e est torrende a si fàghere mere de s'istòria sua".
  "Como", concluit Meloni, "apo a andare a totu sas àulas de giustìtzia in ue m'ant a protzessare  impitende sa limba sarda mea, a manera de mi torrare a apoderare  de sa natzionalidade sarda mea".
A su chi nat chi est essidu a pìgiu dae s'inchiesta, Meloni operaiat cugugiadu dae duas sotziedades, sa "Felix commerciale" de Terralba, sa bidda in ue istat, e sa "Marceddi' srl" de Marrùbiu, intestada a una de sas fìgias: a issa  sos finantzieris l'aiant ghetadu in cara  de àere produidu sa botàriga sena permissu. A s'indipendentista, titulare finas de sa  "Trasporti Alpha" de  Terralba fallida in su 2007, e a sa fìgia, nche lis ant secuestradu  benes e immòbiles pro  600mìgia èuros. Meloni est incurpadu finas  de  isfrutamentu de su traballu nieddu  de  23 traballadores italianos  e rumenos impreados in sa sotziedade de  trasportos.

Ligàmene: http://www.agi.it/cronaca/notizie/201107011338-cro-rt10097-fisco_evasione_avviso_chiusura_indagini_in_sardo_per_doddore

#Sarvadore Serra

» in segus