bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


27/03/2011

Una sèrie de cunferèntzias pro faeddare de sos poetas a bolu

Las at amaniadas s'Assessoradu Regionale de s'Istrutzione Pùblica

Ant fatu in custas dies, in Casteddu, sa Cunferèntzia “Poetas a bolu - isparghidores e amparadores de sardu”. Est istada sa  prima de una sèrie  de manifestatziones  amaniadas dae s'Assessoradu Regionale de s'Istrutzione Pùblica, Benes Culturales  Informatzione, Ispetàculu e Isport, in ue sunt interessados  sos assòtzios culturales chi s'òcupant  de poesia improvisada in limba sarda.

A pustis de custu primu addòviu, b'at in programa àteros apuntamentos  in àteras realidades territoriales  de Sardigna,  pro faeddare prus a fundu  de sas diferentes formas de improvisatzione. Ant a tratare argumentos de importu, che a s'impreu  de una forma de sardu literàriu dae bandas de sos poetas a bolu,  chi est resessida  a cunvìvere in su tempus  cun sas variedades locales sìngulas. Ant a fàghere finas un'anàlisi de comente in sas garas, dae su 1896, annu de sa prima presentada in su palcu de sos improvisadores, finas a  oe, apant tratadu su tema de sa limba sarda. Ant a  fàghere, in fines, su puntu  de sas modalidades  cun sas cales sos assòtzios culturales etotu gherrant pro promòvere e pònnere in contu su sardu, mantenende in su matessi tempus sa traditzione  de sa poesia improvisada.
Sos relatores sunt  Giosepe Porcu (in sa fotografia), su poeta a bolu prus giòvanu in atividade, Brunu Agus, finas isse improvisadore afirmadu, presidente de  “Su Sòtziu pro sa gara”, e s'espertu  Pàulu Pillonca, connoschidore mannu  de sa poesia improvisada  e autore de publicatziones medas  in propòsitu.
Sa poesia a bolu  est una forma de poesia improvisada in rima otava fundada in su cunfrontu dialèticu  intre sos poetas a fùrriu de unu tema  fissadu dae àteras pessones. Sos poetas cantant sos versos issoro acumpangiados  dae unu cuncordu  a tenore, realizende unu connùbiu ditzosu  intre poesia e musica, chi costituit una forma de arte originale cumplessa,  de impatu e efetividade comunicativa mannos.

#Sarvadore Serra

» in segus