bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: LIBROS·PELLÌCULAS·SITOS:
cumpartzi custa noa cun sos amigos tuos invia mail stampa

LIBROS·PELLÌCULAS·SITOS:


30/03/2012

Fidele a sos printzìpios

Unu libru pro ammentare a Alfons Benedikter

In ocasione de su  primu annu dae sa morte de Alfons Benedikter (1918-2010), sa figura de custu grandu òmine polìticu, architetu de s’autonomia sudtirolesa, l’ant torrada a ammentare in una regorta de iscritos interessante, Den Grundsätzen treu geblieben. Alfons Benedikters Wirken für Südtirol im Spiegel der Erinnerung (Fidele a sos printzìpios. S’impinnu de Alfons Benedikter pro su Südtirol in sos ammentos de chie lu connoschiat).

Su volùmene, cuidadu dae Thomas Benedikter (su de tres de sos ses fìgios), collit cuntributos medas de pessones ligadas a Benedikter dae raportos polìticos, familiares o culturales. Sos autores sunt Alfons Benedikter, Hans Benedikter, Norbert Dall’Ò, Rosa Fran-zelin-Werth, Henriette Klier, Eva Klotz, Egon Kühebacher, Helene Oberrauch, Reinhard Olt, Peter Ortner, Konrad Palla, Giorgio Pasquali, Gennaro Pellegrini, Oskar Peterlini, Josef Rampold, Martin Schweiggl, Adolf Spitaler, Martha Stocker, Heinz-Siegfried Strelow, Peppi Tischler, Paolo Tonelli e Friedl Volgger. 

B’at finas un’intervista cun Benedikter fata dae Georg Schedereit e Helmut Lechthaler.

Sos cuntributos sunt totus in tedescu francu sos tres firmados dae italianos. 

Si notant mescamente sos de Heinz-Siegfried Strelow, chi marcat sa sensibilidade ecologista de Benedikter, e sos dedicados a sa mugere Waltraud Noldin, fìgia de Josef Noldin, s’avogadu eròicu de Salorno chi aiat organizadu sas iscolas clandestinas tedescas durante sa ditadura fascista. A propòsitu de custa figura importante a beru, a dolu mannu disconnota in Itàlia, Thomas Benedikter at cuidadu su libru Josef Noldin. Ich will nicht Gnade, sondern Recht (Athesia, 1999). 

Cumponente de unos cantos organismos amministrativos locales, figura tzentrale de su Südtiroler Volkspartei (SVP) e pustis fundadore de s’Union für Südtirol, Alfons fiat un’ òmine cumpetente e determinadu, lùghidu e passionale in su matessi tempus. Si oe s’autonomia sudtirolesa est unu modellu chi s’istùdiat in totu su mundu, si Bozen istràngiat unu de sos istitutos ispetzializados prus valorosos chi tratant custos temas, devimus torrare gràtzias finas a custu visionàriu mentifine.

[dae EJA, 9, 2012]

#Sarvadore Serra

» in segus