bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos invia mail stampa
documentu 5 di 16
 

13/06/2011

Programas informàticos pro sas istitutziones culturales europeas

Nd'ant faeddadu in s'addòviu Hack4Europe

Unos cantos  programadores informàticos, chi traballant pro creare aplicatziones pro sas fontes digitalizadas de 1.500 istitutziones culturales europeas,  ant leadu parte in Hack4Europe, una riunione fata in manera simultànea in Bartzellona, Londra, Istocolma e Poznan.

S'addòviu l'at ammaniadu sa biblioteca digitale  Europeana, chi mandat a dae in antis unu programa de sa  Cummissione Europea pro dare difusione a sos assetos digitales de atzessu lìberu  a museos, gallerias, librerias e archìvios, una colletzione immensa  de prus de 18 milliones de registros chi andant dae sos disinnos  de Leonardo da Vinci a sa   documentatzione  de sa Prima Gherra Mundiale, a su  manuscritu de 'S'Orìgine  de sas ispètzies' de Darwin, pro fàghere petzi carchi esempru.

In su casu de sa capitale catalana, una bintina de programadores, acudidos  dae Ispagna  e dae àteros paisos de s'àrea mediterrànea, si sunt riunidos in su  Museu Picasso, organismu coorganizadore de s'eventu.

"Los amus invitados a creare aplicatziones pro dare  un'usu sotziale prus mannu  a sa cantidade istremenada de fontes de Europeana, chi,  macari tèngiat  unu chircadore poderosu meda  pro temas, si cheret abèrrere a dispositivos ispetzìficos, pro telefoneddos o pro  retes sotziales, chi agiuent  a s'acurtziare mègius  a sas colletziones de sos museos e de sas bibliotecas", at craridu Concha Roda, coordinadora de sos progetos de su Museu Picasso.

Un'àtera idea  est a fàghere a manera chi  sos utentes de custos istrumentos venidores potzant inserire sos datos issoro, o finas creare ligàmenes  cun prataformas che a s'entziclopedia   digitale Wikipedia.

Sos archìvios digitalizados in ue si podet traballare includent cuadros, disinnos, mapas, fotografias e imàgines  de sos ogetos  de sos museos, e finas testos (de libros e giornales), sonos (registratziones de música o de discursos in suportos diferentes) e vìdeos (cun pellìculas, noas o programas televisivos).

"Hack4Europe" tenet, in prus, un'elementu cumpetitivu, ca at a premiare  sos protòtipos  chi mègius mustrent sas possibilidades chi dat  s'impreu de custos registros abertos:  sos programadores de sas aplicatziones chi tenent su potentziale prus mannu  dae su puntu de vista cummertziale ant a partetzipare a una tzerimònia ispetziale  de s'Assemblea de s'Agenda Digitale in  Brussellas.


#Sarvadore Serra

» in segus