bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: INTERVISTAS
cumpartzi custa noa cun sos amigos tuos invia mail stampa

INTERVISTAS


08/08/2011

Manuelle Mureddu: fumetes in sardu

Intervista

Comente ses nàschidu illustradore/fumetista (o su chi ti definis)?
Deo so siat un’autore de còmics siat un’illustradore. Sunt artes diferentes ma chi a bortas si addòviant.
No isco nàrrere comente apo cumintzau. Sa prima cosa est s’esigèntzia de contare, de faveddare, de nàrrere sa tua, chi si tatat, chi si cheret tatada, e custu est su sentiu. No est una cosa chi detzidis, est una esigèntzia, unu disizu.
A pustis b’at unu issèperu. S’issèperu cussiente ti permitit de mudare una passione in unu traballu.
Ma tocat de si sacrificare meda. Non benit naturale.
Est una gherra.

In ue as istudiadu?
Si pro istùdios cussideramus cuddos canònicos, apo fatu s’Istitutu de Arte de Nùgoro e a pustis sa “Scuola Internazionale di Comics” in Itàlia, in Roma.
Ma non sun sos ùnicos istùdios importantes, antzis. S’istùdiu de unu creativu est a traballare cada die chi Deus mandat in terra pro s’elevare. Non a disinnare ebbia, ma a istudiare meda, pro cumprèndere su mundu. S’estètica de sas cosas ti contat su mundu in ue istas.

< div>E sos temas tuos cales sunt?
Dipendet. Apo essentzialmente duos filones pro como, su primu est su chi est prus connotu, chi at a fundamentu sa cultura sarda, mascamente sa disconnota, sia comente estètica siat comente istòria. Su sicundu, prus pacu connotu, est intimista, su forrocare in sas intrannas meas.
In beridade pesso chi sos duos temas non sien pro nudda istacaos fra issos, antzis.
A bortas sos contos chi paren pru lèpios, comente cussos pro pitzinnos minores, sun cussos chi an prus livellos, sos prus introspetivos.

Comente est su mundu de custa de casta de arte in Sardigna?
Potentìssimu! Vivìssimu! Bellìssimu!
Pro ti fàchere un’idea pessa chi ocanu b’at unu sardu candidau a sos Eisner Award, una casta de Oscar de sos còmics americanos!

Ite novidades b’at in custu mundu?
Sa novidade sun sicuramente sas Graphic Novel e su Graphic Journalism.
Sas primas non sun àteru si non romanzos a fumetes e, che a totu sos romanzos, nd’atzapamus de istiles, temàticas, argumentu e livellu diferente, esatamente che a unu libru “normale”!
Su Graphic Journalism est su giornalismu disinnau. Reportages veros realizaos in locu e documentaos in forma còmics.
Famau meda Palestina su traballu de Joe Sacco, autore maltesu, supra sa chistione apuntu palestinesa o puru Quaderni Ucraini, unu biazu in sa ex Unione Soviètica fatu dae Igort, mastru mannu de sos còmics mundiales. Ah, Igort est sardu.

A carchi iscola apartenes o a contu tuo ses?
No isco respundere a custa dimanda. Sicuramente mi sento europeu.
E su pùblicu comente rispondet a sas òperas tuas?
Bene meda. Sa zente lu cumprendet cando pones passu.

Ite as fatu/produidu finas a como?
Eh, totu est longu de nàrrere! Sas cosas de ammentare sun totu sos contos minores chi sun istaos regoltos in su libru Arbarèe-Contos de sa Terra de s’Àrbore (Domus de Janas editore), pustis podimus ammentare sas illustratziones de lu libru Sa Die de sa Sardigna, iscritu dae Rossana Copez e produiu dae sa Regione, su postale de sa limba sarda in Aristanis, una sèrie de sàtiras de Remundu Piras illustradas, su libru supra de Biada Maria Gabriella... Sun medas!
Pustis, publicatziones vàrias de còmics in Sardigna, in Itàlia e in Grètzia, chi an àpiu atentzione meda dae su setore.
A luego su libru novu, est zai finiu. Abbarrae a contu!

Ite ses disinnende/progetende pro su tempus venidore?
Fipo nande, est in essia su libru novu (mancari nos torramus a intèndere cando essit!) pro su mercau sardu, bos at a fàchere piachere chi est istau iscritu chin grafia normalizada!
De sos progètos pro su benidore non naro nudda, b’at cosas pro su mercau editoriale sardu e cosas pro sos mercaos istranzos. Amus a bìere!

Pregontas de Diegu Corràine

[dae EJA 5, làmpadas-trìulas 2011]

#Diegu Corràine

» in segus