bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: INTERVISTAS
cumpartzi custa noa cun sos amigos tuos invia mail stampa

INTERVISTAS


17/01/2011

CLÀUDIA ARU: «SA FORTZA DE UN'ARTISTA EST A USAI SA CULTURA PRÒPIA»

Intervista de Diegu Corràine a Clàudia Aru, cantante de su grupu sardu BENTESOI

Dae cando est chi ses cantende in sardu?
Apu inghitzau a cantai in sardu de pagu, de candu apu cumprendiu ca sa lingua sarda mi donat sa possibilidadi de essi speciali e no cumenti a is atrus chi cantant sceti in italianu o inglesu po essi prus "internatzionalis". In custu tempus sa fortza de un'artista est a usai sa cultura pròpia. A un'americanu ddi praxit de prus a ascurtai una cantzoni in sardu chi no una in inglesu scrita de una cantanti sarda.

E pro ite in sardu? Ite bos dat custa limba chi non bos dat s'italianu?
Cun su sardu podis descriri una situatzioni cun una paràula sceti. Una cosa cumenti "fillu miu de su coru", non si podit narai in italianu cun sa matessi intensidadi. Po custu mi praxit meda de prus.

Ite genia de mùsica sonades? E comente mai ais isseberadu custa genia de mùsica?
Sa mùsica chi fadeus nosu est eletrònica però traballaus meda cun musicistas diferentis, de Marinu de Rosas a Aleni Ledda o artistas hip hop e djs. Est un'ammisturu de cosas cun sa idea de una Sardigna chi chistionat cun is culturas de su Mediterràneu. A sa fini seus in su centru de custu mari e depeus usai custa cosa cumenti sa fortza nostra. Nosu fadeus custa mùsica poita seus nascius in su 1981 e poneus in custu traballu totu su chi eus biu e ascurtau fintza a imoi.

Pro ite l'ais postu custu nùmene a su grupu bostru: Bentesoi?
Poita si praxiat sa paràula, cumenti apu nau, «Bentesoi» tenit sentidu sceti in sardu , est su bentu callenti, su bentu de su soli, su "Scirocco" in italianu, su Tzalocu in atrus logus de Sardigna, tenit calincuna cosa màgica ... su bentu chi benit de su soli...

In cantos e de ue seis?
Seus in duus, deu de Biddexidru e Frantziscu Medda (Arrogalla) de Cuartu Sant'Aleni.

Su sardu lu connoschiaias giai o l'ais imparadu dae pagu?
Deu ddu connoscia pagu, Frantziscu fiat prus bonu de mimi, però a pagu a pagu seu imparendi. Su segretu est a intentai a fueddai sempri e ascurtai meda sa genti chi ddu scit fueddai beni.

De ite faeddades in sos testos de sas cantzones?
Fueddaus de totu su chi sutzedit e in una manera chi si tocat, scrieus meda de problemas sotzialis poita bieus in una temporada difìtzili meda po sa generatzioni nostra.

Chie las iscriet?
Casi sempri deu scriu is testus , Frantziscu m'agiudat cun ideas e intentu sempri de scrìiri in acordu cun su chi pensat issu puru.

E ite narat de bois su pùblicu?
Sa mùsica chi fadeus est unu pagu particulari, bollu nai ca fueddaus cun unu pùblicu chi arrexionit, po custu seus prexiaus meda po totu sa genti chi s'ascurtat, sonaus meda e scieus ca no est fàtzili . Teneus unu pùblicu chi andat de is giòvanus fintza a sa genti prus manna , no sonaus sceti po "una edadi". Bentesoi no tenit edadi.

Cale est istadu su cuntzertu chi bos est agradadu de prus?
Eus sonau meda, in Sardigna, Itàlia e in Europa puru, si spassiaus sempri meda. In Bologna, candu andaus, est sempri una festa, in Sardigna eus sonau po sa Coja Maurreddina in Santadi e a sa fini fiaus totus prexiaus meda, fiant baddendi totus! Pipius e bècius! Una festa. Però sa genti s'at ascurtau cun interessi mannu in Madrid, Bruxelles, Berlinu, gràtzias a su progetu Brinc@ chi agiudat sa mùsica sarda a essiri de s'ìsula.

E discos, publicadu nd'aias?
Eja, Triplan, Folk you essius cun sa Nootempo

E prèmios retzidu nd'ais?
S'annu passau s'ant seletzionau po su Festival de is linguas minoritarias in Udine, SUNS, una esperièntzia importanti meda po nosu.

Ite programas tenides pro su tempus benidore?
Bolleus traballai ancora, seus pensendi a unu discu nou, cosas de fai ci ndi funt meda! Su bentu est suendi!

38504_414608984655_657114655_4364479_8103117_n.jpg

#Diegu Corràine

» in segus