bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: GLOSSÀRIU
cumpartzi custa noa cun sos amigos tuos invia mail stampa

GLOSSÀRIU


08/12/2010

INDIPENDENTISMU

de Diegu Corràine

Idea, movimentu, tendèntzia de chie, apartenende a una natzione oprimida o non reconnota, pessat e disinnat unu progetu polìticu pro fraigare un'istadu a sesi, indipendente, duncas non dipendente dae entidades superiores e non ligadu a perunu àteru istadu.

S'indipendentismu est unu de sos èsitos istitutzionales possìbiles  de s'esertzìtziu de soverania [bide]. Sa soverania, comente espressione prena de su deretu de autodeterminatzione  natzioanle, est s'espressione de su natzionalismu de liberatzione (bide "natzionalismu"), chi est sa base, su motore, sa dotrina, s'ideologia, de cale si siat propòsitu istitutzionale cuncretu de soverania. Una natzione chi resessit a èssere, in cale si siat manera (patzìfica o nono), soverana, podet isseberare liberamente una solutzione istitutzionale indipendente (in unu "istadu mononatzionale" [bide]) o cunfederada (in unu "istadu plurinatzionale" [bide]) cun àteras natziones, in cunditzione de paridade. In manera paradossale, una natzione lìbera e soverana diat pòdere finas rinuntziare (esertzitende su deretu de autodeterminatzione) a sa soverania!

Duncas, su natzioanlismu de liberatzione est sa cunditzione de s'indipendentismu. Tando non tenet perunu sentidu s'indipendentismu sena natzionalismu. Diat èssere comente a èssere catòlicos sena èssere cristianos, o catòlicos non-cristianos. Imbetzes, unu natzionalista podet èssere finas no indipendentista, si issèberat una solutzione istatuale cunfederada.

In manera diferente devimus cunsiderare sos protzessos indipendentistas de su prus de sas excolònias de sos istados europeos, mescamente a pustis de sos annos '60, in Àfrica e in aterue.  In custos casos, sos movimentos anticoloniales ant costituidu istados-natzione cun làcanas artifitziales, non basadas in limbas e in natziones, chi ant riproduidu colonialismos internos in sa matessi manera de in antis de s'indipendèntzia. Su mustra de custu est chi custos istados ant impostu, belle semper, comente limba ufitziale sa limba de sos excolonizadores e su podere de una natzione subra de un'àtera.

#Diegu Corràine

» in segus