bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


14/10/2013

Cuncursu Max Leopold Wagner de limba sarda pro tesis de làurea / SARULE 2014

Bandu de su cuncursu / Iscadèntzia 28-02-2014

A 51 annos dae sa morte, su 9 de trìulas de su 1962

Max Leopold Wagner, nàschidu in Mònacu de Baviera su 17 de cabudanni de su 1880, mortu in Washington su 9 de trìulas de su 1962, est istadu unu grandu linguista, chi at dedicadu parte manna de sa vida sua a s'istùdiu de sa limba sarda. 

At tentu su mèritu mannu de àere afirmadu sa personalidade de su sardu comente limba, mescamente cun s'òpera "La lingua sarda" e cun su DES, Ditzionàriu etimològicu sardu.
Ocannu, duncas, ruiant sos 51 annos dae sa morte sua in su 1962.

Cale ocasione mègius de s'istitutzione de unu Prèmiu intituladu a Wagner e chi, in su matessi tempus, agiuat sos istùdios linguìsticos IN limba sarda, mescamente de giòvanos?

Pro custu, su Prèmiu est destinadu a Tesis de làurea in limba sarda de cale si siat argumentu e a Tesis de làurea in cale si siat limba ma de argumentu linguìsticu sardu.

Diegu Corràine

..........

BANDU de su Cuncursu Max Leopold Wagner de limba sarda pro tesis de làurea

Papiros Editziones e Sotziedade pro sa limba Sarda cun su patronadu de

sa Comuna de Sarule, promoent e organizant su

CUNCURSU MAX LEOPOLD WAGNER DE LIMBA SARDA PRO TESIS DE LÀUREA

Su cuncursu tenet 2 setziones:

setzione 1: Tesis in sardu de cada argumentu o facultade* > Prèmiu 500 euros

setzione 2: Tesis in cada limba de argumentu linguìsticu sardu* > Prèmiu 500 euros

*Sa matessi tesi podet partetzipare petzi a una setzione.

Sas tesis devent èssere istadas discùtidas in sos ùrtimos 3 annos (duncas, in sos annos acadèmicos 2010-2011,  2011-2012,  2012-2013.), in cale si siat universidade.

Sas tesis de sa prima setzione devent giai resurtare comente iscritas TOTU IN SARDU in su mamentu de sa làurea.

Sas tesis devent essere imbiadas in su formadu eletronicu .pdf a s’indiritzu de posta eletronica papiros.ed@gmail.com intro de 28/02/2014 cun totu sos datos personales, annu de làurea, indiritzu e numeru telefonicu. Sos partetzipantes ant a retzire una lìtera eletrònica chi cunfirmat sa cunsinna de sos documentos.

Sa premiatzione at a èssere su 4 de MAJU de su 2014, in Sarule.

Sos organizadores s'impinnant a non divulgare sos traballos sena su permissu iscritu de s’autore.

Su presidente de sa giuria est Bachis Porru

Su segretàriu est Diegu Corràine

...............

BOS PREGAMUS DE CUMPARTZIRE CUSTA NOA


#Diegu Corràine

» in segus