bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


09/08/2012

B'est torra su Festival de sa cantzone in sas limbas minoritàrias

Pro si marcare, b'at tempus finas a su tres de cabudanni

Torrat su Festival de sa cantzone  in sas limbas  minoritàrias europeas, chi faghet parte de s'inghìriu musicale de su Liet International. Lu faghet ischire  s’ARLeF, Agjenzie Regjonâl pe Lenghe Furlane, chi at publicadu su bandu pro leare parte  in  Suns 2012. Su Festival est cròmpidu a sa de bator editziones. Lu faghent dae s'agabbu de santugaine  a su cumintzu de santandria  in Udine. Si cunfirmat comente unu  de sos eventos musicales de interessu prus mannu, e custu si bidet dae sa partetzipatzione  de sos artistas chi est creschende annu cun annu: in s'editzione  2011, in Falera, in Isvìtzera, ant cuncursu  47 cantzones in 12 limbas diferentes.

Suns 2012 l'ant ammaniadu pro sos artistas chi istant  in Itàlia, Isvìtzera, Austria, Islovènia e Frantza. Podent partetzpare custas limbas:  friulanu, sardu, tedescu, albanesu, francu-proventzale, frantzesu, otzitanu, islovenu, ladinu, catalanu, croatu, grecànicu, romanì (pro s'Itàlia); romanciu (pro s'Isvìtzera); romanì, croatu, islovenu, ungheresu, tzecu, islovacu, (pro s'Austria); ungheresu , romanì, italianu, tedescu (pro s'Islovènia); otzitanu, francu-proventzale, catalanu, romanì (pro sa Frantza).

Sos duos artistas chi ant a bìnchere Suns ant a èssere ammissos  a sa fase finale de su Liet International (www.liet.nl), su  Festival de sa cantzone in limba de minoria prus importante a livellui internatzionale , chi ocannu lu faghent  in Xixón - Gijón,   Printzipadu de sas Astùrias (in s'Istadu ispagnolu),  su primu de nadale.

Pro bi leare parte tocat a imbiare  sos cumponimentos  intro de su  3 de cabudanni 2012. S'ischeda de partetzipatzione  si podet iscarrigare  dae su situ internèt www.arlef.it. In prus de s'ischeda tocat a presentare : una cantzone, in cd o mp3; su testu e sa tradutzione in inglesu e/o italianu; una biografia curtza . Ant a èssere ammissos petzi  cumponimentos  originales  chi non fatzant parte de sos repertòrios traditzionales  de sas regiones de provenièntzia. Info: 0432555724.

Suns est nàschidu in  Udine in su 2009, ca l'at promòvidu s'’ARLeF cun s'agiudu de sa Provìntzia de Udine, de sa Comuna de Udine, de sa Cooperativa "Il Campo" e de sa cooperativa "Informazione Friulana". Creadu comente  festival itinerante, est unu  ponte ideale intre sas minorias linguìsticas  istòricas de su territòriu  e faghet parte de s'inghìriu musicale de su  Liet International. Sas primas duas editziones las ant fatas in  Udine; in su 2011, bidu su resurtadu bonu, nche l'ant tramudadu a Isvìtzera, in Falera. 


#Sarvadore Serra

» in segus