bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


06/12/2010

Una Babele pro unire pòpulos e limbas.

Cumintzat oe e durat una chida, in Casteddu, su Babel Film Festival,  sa rassinna-cuncursu internatzionale de tzìnema dedicada a sas minorias linguìsticas

Ses  dies de  pellìculas, mùsica, teatru e dibàtidos pro faeddare de minorias linguìsticas e culturales: est cumintzadu oe in Casteddu  su Babel Film Festival, organizadu dae sa Società Umanitaria-Cineteca Sarda  paris cun s' Associazione Babel e sa Società Audiovisuale, e cun su patronadu de sa Regione sarda, de sa Provìntzia e de sa Comuna de Casteddu e de sa Fondazione Banco di Sardegna.

Sa finalidade de custu eventu est a dare visibilidade a sas periferias chi non si cherent prus postas a un'ala, mustrende totu   sa richesa issoro.  In custu cuntestu, est tzentrale sa positzione de sa Sardigna,  siat pro sa richesa linguìstica sua, siat ca  est inghiriada dae sa realidade catalana, dae sa corsicana, dae su mundu bèrberu de s'Àfrica setentrionale e dae sas limbas de minoria presentes in Ìtalia.

In su cuncursu leant parte contos tzinematogràficos  e documentàrios. Sa cunditzione est chi in sas pellìculas si faeddaet  a su nessi pro  su 60% in una limba de minoria.

Su presidente de sa giuria est su regista  Giorgio Diritti. Sos cumponentes sunt:  Marco Asunis, presidente de sa Federazione Italiana Circoli del Cinema e responsàbile de su prèmiu de su pùblicu; Gianni Canova, crìticu tzinematogràficu, diretore de sa rivista I duellanti e professore in sa IULM (Istituto Universitario di Lingue Moderne) de Milanu; Silvia Negrotti, psicòloga, esperta de mèdios de comunicatzione de massa e de minorias linguìsticas; Anna Pavignano, iscenegiadora, responsàbile de su prèmiu NUCT. 

In programa b'at 33 pellìculas in cuncursu e 11 foras de cuncursu.


#Sarvadore Serra

» in segus