bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


10/11/2010

Projetzione cortometràgiu "Deu ci sia"

SÌLIGO, chenàbura 12 de santandria

Sighit su tziclu “limba sarda e tzìnema” in Meilogu, organizadu dae s’Ufìtziu de sa limba sarda de sas Comunas de Bànari, Sìligo e de Bunnànnaru, in collaboratzione cun sa Fundatzione Maria Carta.

A pustis de s’èsitu bonu chi b’at àpidu in Bànari su 3 de santandria coladu, sa projetzione de su cortometràgiu “Deu ci sia” s’at a fàghere in Sìligo su 12 de santandria a sas 17.30 in su tzentru de agregatzione sotziale. Sa pellìcula de su regista piemontesu Gianluigi Tarditi at a èssere presentada dae Clara Farina, atora coprotagonista, e dae Juvanna Tuffu, responsàbile de s’Ufìtziu de sa limba sarda de sa Comuna.
Produidu dae sa Ophir Production de Tàtari, su cortometràgiu tenet unu grupu totu sardu de atores e  intre sos interpretes b’at finas Clara Murtas in sa parte de sa fèmina agabbadora, Mario Olivieri, Daniele Meloni, Michele Carboni, Carla Orrù, Fabio Vannozzi.

Un contu tzinematogràficu bellu meda chi moet dae su drama de una famìlia sarda de s’agabbu de s’Otighentos in ue sa maladia de su babbu bogat a campu relatziones e dinàmicas chi creschent a bellu a bellu a inghìriu de su letu de su moribundu e in ue sa presèntzia forte de s’agabbadora trasmitit rispetu e timòria.

Ambientadu in sos istatzos gadduresos, gadduresu est finas su tìtulu de s'òpera cando chi a faeddare in sardu est sa protagonista in sa parte  umbrosa de s’agabbadora, una figura chi si pessat chi apat operadu in totu sa Sardigna finas a sos annos ’50 de su sèculu coladu e chi agabbaiat sas pessonas chi fiant in s'oru de sa morte, cun unu corfu de martzeddu de ogiastru, su “magiolu”.

"Deu ci sia” at rapresentadu sa Sardigna e s’Itàlia in s’ùrtima editzione de su New York Film Festival e at bìnchidu prèmios in totu su mundu.

#Diego Corraine

» in segus