bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


26/09/2011

Pro cada limba chi faeddas tenes una vida in prus

Cumintzat oe sa Die europea de sas limbas

"Pro cada limba noa chi faeddas tenes una vida in prus; si connosches petzi una limba, vives petzi una bia ". Custu ditzu tzecu est una de sas paràulas de òrdine de sa Die  europea  de sas limbas n. 10, chi dae oe pro carchi die  at a èssere marcada  dae unos cantos eventos, comente  cunferèntzias, leturas de poesias, giogos a intzertare e giogos de carrera. S'idea est a promòvere s'imparòngiu de sas limbas  e a festare sa diversidade linguìstica europea, moende  dae sas 23 limbas "ufitziales" de sa UE finas a nche cròmpere  a sa profusione de limbas  e dialetos coufitziales, regionales e minoritàrios.

Androulla Vassiliou, Cummissàriu europeu responsàbile pro s'istrutzione, sa cultura, su multilinguismu e sa gioventude, e Thorbjorn Jagland, Segretàriu generale de su Cussìgiu de Europa, ant a firmare una decraratzione cungiunta pro pònnere in craru s'impinnu pro su  multilinguismu. Sa presidèntzia polaca de sa UE at dadu  un'importu primàriu  a sa connoschèntzia de sos idiomas, cramende sos giòvanos   a imparare duas limbas  in prus de sa limba materna, pro  cròmpere mègius a sos obietivos issoro personales e professionales

S'UE investit unu  milliardu de èuros a annu  in programas chi punnant a afortire sas abilidades linguìsticas e sas cumpetèntzias de àteru tipu, cun initziativas  che a Erasmus, chi permitit  a sos istudentes universitàrios de nche colare parte de su perìudu issoro de istùdiu o de formatzione in un' àteru logu. In mesu de sas àteras initziativas finantziadas dae sa UE bi sunt finas  su  programa Leonardo da Vinci (formatzione professionale) e su  programa Gioventude  in atzione (voluntariadu/traballu de giòvanos). In intro de s'impinnu suo pro s'isvilupu  de s'aprendimentu  de sas   cumpetèntzias linguìsticas, sa Cummissione cheret duplicare su nùmeru  de  custas bursas  in su progetu suo de bilàntziu  pro su perìudu 2014-2020. Sa UE, in prus,  investit 50 milliones de èuros a annu pro agiuare atividades e progetos de natura linguìstica .

#Sarvadore Serra

» in segus